2020 – TMKI.org

Social Awareness

ஆன்றோர் சான்றோர்களை ஆய்வுக் கண்ணோட்டத்துடன் அணுகும் முறையே இஸ்லாமிய முறை.

சமூக அரசியல் விவகாரங்களில் தொலைநோக்குப் பார்வையுடைய தலைவர்களைப் பெற்ற சமூகங்களின் வளர்ச்சியில் எப்போதுமே தேக்கநிலை இருக்காது. அதன் இளைஞர்கள் தன்னம்பிக்கை மிகுந்தவர்களாக சரியான இலக்கை நோக்கி முன்னேறிக் கொண்டிருப்பார்கள்.

அப்படிப்பட்ட ஒரு மகத்தான தலைவரை குடியரசு இந்தியாவின் முதல் 20 ஆண்டுகளுக்கு முஸ்லிம் சமூகம் பெற்றிருந்தது.

காயிதே மில்லத் முஹம்மது இஸ்மாயில் சாஹிப் அவர்களின் தொலைநோக்குப் பார்வையை, உணர்ச்சிகளுக்கு இடமளிக்காமல், சித்தாந்த ரீதியாக நேரெதிர் நிலைப்பாடுடைய தலைவர்கள் அமைப்புகளுடன் கூட சுமூகமான அரசியல் உறவுகளை வளர்த்து வந்துள்ளதை இன்றைய இளைஞர்கள் ஆழ்ந்து வாசிக்க வேண்டும்.

அவர்களுக்கு ” கவ்மின் காவலர் ” என்ற அடைமொழி உண்டு. காயிதே மில்லத் முஹம்மது இஸ்மாயில் சாஹிப் அவர்கள் ஒரு குடும்பத்திற்கோ, முஸ்லிம்களின் ஒரு சிந்தனைப் பிரிவுக்கோ,ஒரு கட்சிக்கோ,ஒரு அமைப்பிற்கோ சொந்தமானவராக ஒரு குறுகிய வட்டத்திற்குள் வாழ்ந்திருந்தால் இந்த அடைமொழி அவர்களை விட்டு அப்போதே அந்நியப்பட்டு போயிருக்கும்.

காயிதே மில்லத் அவர்கள் ஒட்டுமொத்த சமுதாயத்தின் தலைவர் என்பதை தங்களது விசாலமான அணுகுமுறையால், அனைவரையும் அரவணைக்கும் உயர்ந்த பண்பாடுகளால், கடும் சொற்களை சுடும் சொற்களாக ஒருபோதும் பயன்படுத்திடாத உன்னத தலைவராக வாழ்ந்து வரலாற்றில் தடம் பதித்துள்ளார்கள்.

அரசியலில் அவர்களின் கூர்மையான தொலைநோக்குப் பார்வைக்கு ஏராளமான எடுத்துக்காட்டுகள் உள்ளன. அதில் முத்தாய்ப்பானது எதுவென்றால் இளமையான இந்திய குடியரசில் எண்ணிக்கையில் சிறுபான்மையாக வாழும் சமூகங்கள் பிற ஆதிக்க சமூகங்களோடு அதிகாரங்களைப் பகிர்ந்து கொள்ளும் மாற்று தேர்தல்முறைக்கு கோரிக்கை விடுத்தார்கள்.

அதாவது நாட்டில் தற்போது நடைமுறையில் இருக்கும் “பெரும்பான்மை ஓட்டுகள் ” என்ற இந்த தேர்தல் முறைக்கு மாற்றாக ” விகிதாச்சாரப் பிரதிநிதித்துவம்” (Proportional Representation) என்ற தேர்தல் முறையை காயிதே மில்லத் அவர்கள் முன்வைத்தார்கள்.

நாடாளுமன்ற மய்ய மண்டபத்தில் உலக வரலாற்றாசிரியர் நேருவைப் பார்த்து ” நீங்கள் 1952 தேர்தலில் 45 % ஓட்டுகள் வாங்கினீர்கள்.1957 தேர்தலில் 47.47 % ஓட்டுகளை வாங்கினீர்கள்.1962 தேர்தலில் 44.72% ஓட்டுகளை மட்டுமே வாங்கினீர்கள். இப்படி ஐம்பது விழுக்காடு ஓட்டுகளை கூட வாங்காமல் ஆனால் தொடர்ந்து மூன்றுமுறை ஆட்சியமைத்து வருகிறீர்கள்.இது ஜனநாயகத்தின் மாண்புகளை குலைத்துவிடும். பெரும்பான்மை தேர்தல்முறை என்ற இன்றைய இந்த தேர்தல்முறை இந்திய போன்ற பன்முகச் சமூகங்கள் வாழும் நாட்டிற்குப் பொருந்தாதது” என்று ஆணித்தரமாக கூறினார்கள்.

தேர்தலில் அவரவர் பெற்ற ஓட்டுகளின் விகிதாச்சாரத்திற்கேற்ப அனைத்து சமூகங்களும் அதிகாரங்களைப் பகிர்ந்து ஆட்சி அமைக்கும் முறையை அடைவது தான் முஸ்லிம்கள் போன்ற கலாச்சாரத் தனித்துவமிக்க சமூகங்களுக்கு பாதுகாப்பானது என்பதை வலியுறுத்தி தொடர்ந்து வாழ்வு முழுவதும் விகிதாச்சாரப் பிரதிநிதித்துவத்திற்கு ஆதரவாக குரல் கொடுத்து வந்தார்கள்.

காயிதே மில்லாத் அவர்களின் இந்த உரிமைக் குரலுக்கு ஆதரவாக 1967 இல் பேரறிஞர் அண்ணா அவர்கள் தலைமையிலான தி.மு.க பொதுக்குழுவில் விகிதாச்சாரப் பிரதிநிதித்துவமே இந்திய நாட்டிற்கு பொருத்தமான தேர்தல்முறை என்று தீர்மானம் நிறைவேற்றியது.

1972. இல் கண்ணியத் தலைவர் காலமானார்கள். கடந்த அரை நூற்றாண்டு காலமாக விகிதாச்சாரப் பிரதிநிதித்துவம் வேண்டும் என்ற தீர்மானத்தை மட்டும் அணைத்து முஸ்லிம் அமைப்புகளின் மாநாடுகளிலும் ஒரு சடங்குக்காக நிறைவேற்றி வருகிறோம். முன்னெடுத்து களம்காண யாரும் தயாரில்லை.

கண்ணியத் தலைவரின் காலத்திற்குப் பிறகு விகிதாச்சாரப் பிரதிநிதித்துவ தேர்தல்முறை குறித்து முஸ்லிம் சமூகத்திற்கும் ஏனைய பிற்படுத்தப்பட்ட ஒடுக்கப்பட்ட சமூகத்தவருக்கும் தொடர்ந்து பயிற்றுவித்து வந்திருந்தால் இன்று ஏறக்குறைய வெற்றிபெறும் நிலையை அடைந்திருக்கலாம்.

இன்றைய தேர்தல்முறையில் சிறுபான்மை சமூகங்கள் ஒருபோதும் அரசியல் அதிகாரத்தை அடைய இயலாது என்பதை மட்டும் கண்ணியத் தலைவரின் நினைவூட்டலாக இங்கு முன்வைக்க விரும்புகிறேன். அவர்கள் வலியுறுத்திய விகிதாச்சாரப் பிரதிநிதித்துவம் என்ற மகத்தான அரசியல் இலக்கை நோக்கி மக்களை இனியாவது நகர்த்துவோம்

Admin November 19, 2020 0

Social Awareness

இப்படி பேசுபவர்களை நாம் எப்போது உருவாக்கப் போகிறோம்.

” மத்திய மாநில அரசுகளே…..

அணைத்து சமய ஆன்மிகத் தலைவர்களே…..

இறைநம்பிக்கை கொண்ட இந்திய மக்களே…..

வெட்டுக்கிளிகளின் படையெடுப்பை கண்டு நம்பிக்கை இழந்துவிடாதீர்.

இது இறைவனின் சோதனை.

மனிதர்களின் குணம் நற்பண்புகளின் எல்லையைத் தாண்டுகிறபோது, மனிதனின் வாழ்க்கை முறை இறைவனின் படைப்பு விதிகளை மீறுகின்றபோது, இந்த பூமியில் இறைவன் படைத்த இயற்கை அமைப்புகளை மனிதன் சீரழிகின்றபோது,இறைவன் புறத்திலிருந்து சோதனைகள் நிச்சயமாக வரும் என்பதை இறைவேதம் அல்குர்ஆன் கூறுகிறது.

“வெள்ளப்பெருக்கு, வெட்டுக்கிளி, பேன் (போன்ற) பூச்சிகள், தவளைகள், இரத்தம் என்பனவற்றைத் தெளிவான அத்தாட்சிகளாக அவர்கள் மீது நாம் அனுப்பினோம். பின்னரும் அவர்கள் பெருமையடித்து குற்றம் புரியும் கூட்டத்தினராக இருந்தனர். ” (7:133)

நாம் நமது தவறுகளை திருத்திக் கொள்வோம்.நமது வாழ்வை புதுப்பித்துக் கொள்வோம். துன்பங்கள் தொடர்ச்சியாக வருகிறது என்பதற்காக இறைவனது கருணையின் மீது எப்போதும் எந்த நிலையிலும் நாம் நம்பிக்கை இழக்கத் தேவையில்லை.அல்லாஹ் மிக்க கருணையாளன் (ரஹ்மான்) அவன் இரட்சிக்க கூடியவன் (முஹைமீன்). பழிவாங்குபவனும் (முன்தகிம்) இரக்கமுடையவனும் (ரவூஃப்)அவனே.

மேலும் ஒவ்வொரு துன்பத்திலும் இன்பம் இருக்கிறது என்பது இறைவனது வாக்கு.அது ஒருபோதும் பொய்க்காது.

வெள்ளம் ஊருக்குள் புகுந்து பல உயிர்களை பழிவாங்குகிறது.பயிர்களை பாழாக்குகிறது. இறுதியில் வெள்ளத்தின் ஒருபகுதி நிலத்தடி நீராக பூமியில் தங்கி மனிதர்களுக்கும் தாவரங்களுக்கும் உயிர்நீராக மாறுகிறது.

அதேபோல வைரஸ் காய்ச்சல் மனிதனை தாக்கி பல நாட்கள் அவனை முடக்கிப்போடுகிறது. விதியின் அடிப்படையில் சிலரின் உயிர்போகிறது.ஆனால் மீண்டவர்கள் உடலில் திடமான நோய் எதிர்ப்புத்திறன் உண்டாகிறது.அது பலவிதமான நோய்களை எதிர்த்து போரிட்டு அவர்களை காப்பாற்றுகிறது.

ஒவ்வொரு சோதனைக்குப் பிறகும் மனித வாழ்வு ஏற்றம் கண்டுள்ளதை உலக வரலாறு நமக்கு காட்டுகிறது.

ஆகையால் வெட்டுக்கிளிகள் படையெடுப்பின் பாதிப்புகளில் இருந்து இந்திய சமூகம் மீள முதலில் இறைவனிடம் பாவமன்னிப்பு தேடுவோம். அதே நேரம் வெட்டுக்கிளிகளில் இறைவன் மறைத்து வைத்துள்ள மனிதர்களுக்கான நன்மைகளை மிக விரைவாக கண்டுபிடித்து உலகிற்கு அறிவிக்கின்றோம்.

உயிரியல்(Biology),பூச்சியியல்(Entomology), புழுக்கள் (Nematology), நிலவியல்(Geology), மண் அறிவியல்(Soil Science), இயற்கை வேளாண்மை (Organic Farming), உயிரி தொழில்நுட்பம் (Bio Technology), விலங்கியல் (Zoology),தாவரவியல்(Botany),மரபியல் மற்றும் தாவர இனப்பெருக்கம் (Genetics and Plant Breeding), நானோ அறிவியல் மற்றும் தொழில்நுட்பம்(Nano Science and Technology), உணவு அறிவியல்(Food Science), போன்ற இயற்கை அறிவியல் சார்ந்த துறைகளில் முனைவர் பட்டம் பெற்றுள்ள பல நூறு ஆராய்ச்சியாளர்கள் அனுபவமிக்க அறிஞர்கள் எங்கள் சமூகத்தில் உள்ளனர்.மேலும் இவை அனைத்தையும் இறைவன் எதற்காக படைத்துள்ளான் என்ற படைப்பு தத்துவத்தையும் சேர்த்துப் பயின்றுள்ள அறிஞர்கள் தான் இவர்கள் என்பதும் எங்களின் தனிச்சிறப்பு. “

…….இப்படி……….இந்திய சமூகத்திற்கு முன்பாக நெஞ்சை நிமிர்த்தி உரக்கப் பேசும் தகுதி வாய்ந்த ஆராய்ச்சியாளர்கள் முஸ்லிம் சமுதாயத்தில் உள்ளனரா என்பதை நாம் சிந்திக்க கடமைப்பட்டுள்ளோம். இவையெல்லாம் வெறும் வேலை வாய்ப்புகளை பெறும் படிப்புகள் அல்ல. அல்லாஹ்வுடைய தீனை அரியனை ஏற்றும் நவீனமான அறிவாயுதங்கள் என்பதை இளைய தலைமுறை உணர வேண்டும்.

காலம் கைமீறி போய்விட வில்லை.

உங்கள் வீடுகளில் உயிரியல் பிரிவில் பயின்ற பள்ளி கல்லூரி மாணவர்கள் இருந்தால் அல்லாஹ்வின் அருளுக்குரிய இந்தப் பாதையில் அவர்களை உருவாக்கிட முன்வாருங்கள். அடுத்த 5 ஆண்டுகளில் அதன் நற்பலன்களை இந்த நாடும் முஸ்லிம் சமூகமும் அறுவடை செய்யத் துவங்கும் என்பது நிச்சயம். அல்லாஹ்வுடைய மார்க்கத்திற்கு மகத்தான எதிர்காலத்தை அது அமைத்துத் தரும் என்பது அதைவிட நிச்சயம்.

Admin November 19, 2020 0

Social Awareness

பிள்ளைகளுக்கு கதை சொல்லுங்கள்.

அடர்ந்த காடு அது. அதைச் சுற்றிலும் அழகான குட்டிக் குட்டித் தீவுகள் இருந்தன. அந்தக் காட்டுக்கு ஒரு வயதான தலைவர் இருந்தார்.

அவருக்குப் பிறகு அந்த மக்களை வழி நடத்த வேறு ஒருவரை நியமிக்க முடிவு செய்தார்.

கடினமான போட்டிகளை நடத்தியே அங்கு அடுத்த தலைவனைத் தேர்ந்தெடுப்பார்கள். நான்கு நாட்கள் நடந்த போட்டிகளில், இரண்டு இளைஞர்கள் தேர்ந்தெடுக்கப் பட்டனர்.

இருவருமே சிறந்தவர்கள்.

இருவரில் யாரைத் தேர்ந்தெடுப்பது என்ற பெரிய குழப்பம் வந்து விட்டது அந்தத் தலைவருக்கு.

மறுநாள் இரண்டு வீரர்களையும் அழைத்தார்,

“இளைஞர்களே! இப்போது நடக்கப் போவது இறுதிப் போட்டி. இதில் ஜெயிக்கும் ஒருவன்தான்

தலைவனாக முடி சூட்டப்படுவான்.

இப்போது உங்களுக்கு சில ஆயுதங்களும், சமையல் பாத்திரங்களும் நம்முடைய உணவு தானியமான சோளம் 1 மூட்டை கொடுக்கப்படும்.

நீங்கள் இருவரும் நம்முடைய காட்டுக்கு அருகிலிருக்கும் வெவ்வேறு தீவுகளில் படகில் கொண்டு போய் விடப்படுவீர்கள். நீங்கள் உங்களிடம் இருக்கும் தானியத்தை சமைத்து சாப்பிட்டு அது தீரும்வரை காட்டிலேயே தங்கி இருக்க வேண்டும்.

தீர்ந்த பிறகு காட்டில் இருக்கும் மஞ்சள் மரத்தின் கிளைகளை ஒடித்து அதைக் கொளுத்துங்கள்.

அதிலிருந்து வரும் புகையைக் கண்டவுடனேயே இங்கிருந்து படகை அனுப்பி உங்களை மீட்போம். உங்களில் யார், கையில் இருக்கும் தானியத்தை அதிக நாட்கள் பயன்படுத்தி அந்தத் தீவில் தாக்குப் பிடிக்கிறீர்களோ அவன்தான் அடுத்த தலைவனாகத்

தேர்ந்தெடுக்கப்படுவான்” என்றார்.

தலைவர் சொன்ன நிபந்தனைகளை 2 வீரர்களும் ஏற்று பயணமானார்கள்.

அவர்களுக்கு ஒரு மூட்டை சோளம் மூன்று மாத காலம் வரும். இறைச்சித் தேவைகளுக்கு அந்தத் தீவில் கிடைக்கும் முயல்களும், மீன்களும் போதுமானதாக இருக்கும்.

ஆனால் சோள அடையோ , சோள சோறோ சாப்பிட்டால்தான் அவர்களுக்குப் பசி அடங்கும்.

இரு இளைஞர்களும் ஆளில்லாத தீவுகளில் வசிக்க ஆரம்பித்தார்கள்.

நாட்கள் ஓடின. மூன்று மாத காலம் முடிந்தது. மக்கள் ஏதேனும் தீவிலிருந்து புகை எழும்புகிறதா என்று உன்னிப்பாக கவனித்துக் கொண்டிருந்தார்கள்.

ஒரு நாள் ஒரு தீவின் கடற்கரையிலிருந்து புகை எழும்பியது. உடனே ஒரு படகு புறப்பட்டுப் போய் அங்கே எலும்பும் தோலுமாக இருந்தவனை அழைத்து வந்தது.

அவன் கரைக்கு வந்ததும் விழுந்தே விட்டான் தரையில். கொஞ்சம் நிதானமாகி, மற்றவன் இன்னும் வந்து சேரவில்லை என்பதை அறிந்து திடுக்கிட்டான்.

இருப்பினும் சுதாரித்துக் கொண்டு தலைவரிடம் சொன்னான்,

“தலைவா, எனக்குக் கொடுக்கப்பட்ட சோளம் இரண்டு மாதத்திற்கு மட்டுமே போதுமானதாக இருந்தும் நான் சாமர்த்தியமாக இத்தனை நாள் தாக்குப் பிடித்திருக்கிறேன். அவனும் என்னைப் போலத் தாக்குப் பிடித்திருப்பான் என்ற நம்பிக்கை எனக்கு இல்லை. எனவே ஓரிரு நாட்கள் பார்த்து விட்டு எனக்கே பதவியைக் கொடுக்க வேண்டுகிறேன்” என்றான்.

தலைவர் அவன் சொன்னதைக் கேட்டு தலையாட்டிக் கொண்டார்.

இன்னும் சிறிது நாட்கள் ஓடி மறைந்தன. நான்கு மாதங்கள் கழிந்து விட்டன. தலைவருக்கே சந்தேகம் வலுத்து விட்டது. தானே நேரில் சென்று பார்த்து விட முடிவு செய்தார். ஒரு படகோட்டியை அழைத்து படகை எடுக்கச் சொன்னார்.

2 மணி நேரத்தில் படகு அந்தத் தீவை அடைந்து விட்டது. அவனை உயிரோடு காணப் போகிறோமா அல்லது எலும்புக் கூடாய்ப் பார்க்கப் போகிறோமா என்ற யோசனை தலைவருக்கு! அச்சத்தில் அவருக்கு நெஞ்சு படபடத்தது.

கொஞ்ச தூரம் காட்டுக்குள் நடந்ததுமே தான் கண்ட காட்சியில் திடுக்கிட்டுப் போனார்.

அங்கே மூங்கிலாலும், ஓலைகளாலும் கட்டப்பட்ட ஒரு அழகான வீடு அவர்களை வரவேற்றது.

அதிலிருந்து அவர் தேடிய இளைஞன் ஓடி வந்தான். முன்னை விட நல்ல புஷ்டியாக மாறி இருந்தான். தலைவரை வணங்கி வரவேற்றான்.

“வாருங்கள் தலைவரே” என்று வீட்டிற்குள் அமர வைத்தான். உள்ளே போய் சூடான சோள அடையும், மீனும் கொண்டு வந்தான் சாப்பிட. அவருக்கு ஒன்றும் புரியவில்லை.

“உனக்குக் கொடுத்த சோளம் 3 மாதத்துக்குள் முடிந்திருக்குமே.?!

நீ என்னவென்றால் அருமையான சோள அடை கொடுக்கிறாய்.?!” நீயும் நன்கு சாப்பிட்டு கொழுத்திருக்கிறாய். இது எப்படி சாத்தியம்.?!” என்றார்.

“கொஞ்சம் என்னோடு வாருங்கள் தலைவரே” என்று அவன் அவரை வீட்டின் பின்புறம் அழைத்துச் சென்றான்.

அங்கே அழகான சோளக் கொல்லை ஒன்று உருவாக்கப் பட்டிருந்தது.

தலைவா,நான் வந்த அன்றே ஒரு முடிவுக்கு வந்து விட்டேன். எனது தானியத்திலிருந்து ஒரு பங்கை எடுத்து விதைத்து வைத்து விட்டேன். இரு மாதங்களிலேயே அறுவடைக்குத் தயாராகிவிட்டது.

நான் எந்தக் கவலையுமில்லாமல் நிறைவாக சாப்பிட்டேன்.

இந்த 4 மாதங்கள் மட்டுமல்ல.

இன்னும் எத்தனை வருடம் வேண்டுமென்றாலும் என்னால் இங்கே சந்தோஷமாய் வாழ முடியும்” என்றான். தலைவர் அவனைக் கட்டி அணைத்துக் கொண்டார்.

பெரும் மகிழ்ச்சி அடைந்தார்.

“நீ தடுமாறிப் போவாய் என்று எண்ணி இந்தப் போட்டியை வைத்தேன்.

நீயோ “உன் அறிவாலும் , உழைப்பாலும் என்னைத் திணறடித்து விட்டாய்.”

நம் காட்டிற்கு ஒரு நல்ல தலைவனை காட்டிக் கொடுத்த கடவுளுக்கு மனமார்ந்த நன்றி, என்றார். நீதி: “கையில் கொடுக்கப் பட்டதை வைத்து, அதை திட்டமிட்டுப் பெருக்கிக் கொள்ளுகிறவர்களே ஜெயிக்கிறார்கள்.

அது பொருளாக இருந்தாலும், வாழ்க்கையானாலும், நேரமானாலும்.?!”

—– கதை சொல்லி இளங்கோ——–

Admin November 19, 2020 0

Social Awareness

நமது சிந்தனைக்குத் தீனி யாரிடமிருந்து வருகிறது.

இளைஞர்கள் எதை சிந்திக்க வேண்டும் எதை விவாதிக்க வேண்டும் எதை உண்ண உடுத்த உபயோகப்படுத்த வேண்டும் என்பதை நமது எதிரிகள் முடிவு செய்ய அனுமதித்தால் இப்போது போல எப்போதும் சமூகம் பலவீனப்பட்டு தான் நிற்கும்.

உம்மத்திற்கு எதிராக யூதர்கள் உலகம் முழுவதும் இதை திட்டமிட்டு செய்கிறார்கள். இந்தியாவிலும் இலங்கையிலும் சங்கிகள் செய்கிறார்கள்.

இளைய தலைமுறைக்கு பயனுள்ள வழிகாட்டல் இருந்தால் பயனுள்ளவற்றில் கட்டுக்கடங்காத வேகத்தை காட்டுவார்கள் அது உம்மத்தை குறுகிய காலத்தில் வளர்ச்சியின் உச்சிக்கு கொண்டு போகும்.இது சமூகத்தின் முன்னோடிகள் செய்ய வேண்டிய அவசியமான வேலை.பன்முகச் சமூகத்தில் வாழும் நாம் இளைய தலைமுறையை இஸ்லாமிய கலாச்சார பண்பியல் வட்டத்திற்குள் வைத்திருக்கும் மிக முக்கியமான கலை இது.

மதம் அரசியல் போன்ற உணர்ச்சிப் பூர்வமான விவகாரங்களில் நிதானம் குறைவாக காணப்படும் வயதில் இளைஞர்கள் கூர்தீட்டி விடப்பட்டால் சொந்த தாய் தந்தை சமூகம் என்றுகூட பார்க்காமல் குத்திக் கிழிப்பதில் மூர்த்தனத்தை காட்டுவார்கள்.

ஆக மொத்தம் குறிப்பிட்ட வயது வரை கட்டுக்கடங்காத வேகமும் மூர்க்கத்தனமும் மனித இயல்பாக இருக்கிறது. ஊரின் பொது காரியங்களில் இளைஞர்கள் புறக்கணிக்கப்பட்டால் முதல்வேலையாக ஊரின் ஒற்றுமைக்கு தீ வைப்பார்கள் என்ற எதார்த்தத்தை மூத்தவர்கள் உணரவேண்டும்

Admin November 18, 2020 0

Social Awareness

வரலாறு முக்கியம் மக்கா…

1946 பஞ்ச காலத்தில் சவூதி அரேபியாவிற்கு நிதியுதவியளித்த தமிழர்கள் என்ற தகவலை வழக்கறிஞர் ஜெய்னுல்ஆபிதீன் அவர்களுடைய பதிவில் பார்த்தேன். ஆச்சரியமான தகவல்.

…………………………………………

சவூதி அரேபியாவை நிறுவியவரும் அன்றைய மன்னருமான மலிக் அப்துல் அஜீஸ் இப்னு சவூது அவர்கள் (இன்றைய மன்னர் சல்மான் அவர்களின் தந்தை) இந்த நிதியை பெற்றுக்கொண்டு நன்றி பாராட்டி தந்தி சொல்லியுள்ளார்கள் என்று அந்த கடிதத்தில் குறிப்பிட்டுள்ளார்கள்.

பதில் கடிதம் ஏதேனும் வந்ததா என்று தெரியவில்லை. கொழும்பிலும் காயல்பட்டினத்திலும் தேடினால் கிடைக்கலாம்.

சவூதி அரசாங்க ஆவன காப்பகத்தில் நிச்சயம் இருக்கும். அப்படியில்லை யென்றாலும் கூட இந்த கடிதத்தை இப்போது மொழியாக்கம் செய்து முறைப்படி அனுப்பினால் பஞ்சகாலத்தில் தமிழ் முஸ்லிம்களின் பங்களிப்பை அதிகாரப்பூர்வமாக பதிவு செய்து விடலாம்.இப்போதவது இதை செய்வது கட்டாயம். இது சாதாரன சம்பவம் அல்ல.

இந்த தகவலை தமிழகம் இலங்கையைச் சேர்ந்த மிக முக்கியமான இரண்டு அறிஞர்களுக்கு அனுப்பியுள்ளேன். முயற்சி செய்து பார்க்கலாம்.

ஒரு செய்தியை நினைவுபடுத்த விரும்புகிறேன்.

1912 இல் துருக்கி உதுமானிய அரசுக்கும் பால்கன் லீக் நாடுகளுக்கும் இடையே போர் நடைபெற்றது. போர் செலவினங்களுக்காக உலக முஸ்லிம்களிடம் கோரிக்கை வைக்கப்பட்டது.

அன்றும் கூட வறுமையில் வாடிய ரோஹிங்கிய முஸ்லிம் விவசாயிகள் ரங்கூனில் இருந்த உதுமானிய அரசின் தூதரகத்திற்கு சென்று 800 லிராஸ் வழங்கினார்கள்.போர் முடிந்து நிவாரணப் பணிகளுக்காக மீண்டும் கோரிக்கை வைத்தபோது ஏறக்குறைய 3000 லிரஸ் அளித்தனர்.

துருக்கியில் உதுமானிய அரசின் ஆட்சிமுறை முடிவுக்கு வந்து குடியரசு முறை ஏற்பட்டு 90 ஆண்டுகள் கடந்தப் பிறகும் கூட……

ரோஹிங்கிய முஸ்லிம்கள் பர்மிய ராணுவத்தால் துரத்தப்பட்ட போது துருக்கி அதிபர் எர்துகானின் மனைவி எம்னி அவர்கள் நேரடியாக சென்று அந்த மக்களுக்கு ஆறுதல் கூறினார்.” வறுமையிலும் எங்களுக்கு உதவிய மக்கள் இவர்கள்” என்று ஜனாதிபதி எர்துகான் குறிப்பிட்டார்.

பர்மிய அரசை சர்வதேச குற்றவியல் நீதிமன்றத்தில் கொண்டு நிறுத்தியதில் துருக்கியின் பங்கு மகத்தானது.

1914 இல் உதுமானிய அரசின் ஹிஜாஸ் ரயில்வே திட்டத்திற்கு அதிகமான நிதியுதவி அளித்தது இந்திய முஸ்லிம்கள் என்பது வரலாற்றில் பதிவாகியுள்ளது. அதில் நிச்சயம் தமிழக முஸ்லிம்களின் பங்களிப்பு அதிகமாக இருந்திருக்கும் ஆனால் ஆவணம் இல்லை.

வரலாறு முக்கியம் மக்கா.

அதைவிட முக்கியம் வரலாற்றை ஆவணப்படுத்துவது மக்கா.

Admin November 18, 2020 0

Educational Awareness

தயவு கூர்ந்து பிள்ளைகளுக்கு பாடப்புத்தகங்களை நடத்தாதீர்.

பெற்றோர்களே….

# உங்களது குழந்தை பருவத்தின் இனிமையான நிகழ்வுகளை பிள்ளைகளுக்கு கதை சொல்வதுபோல சொல்லிக்கொடுங்கள்.

நாமும் அதை அனுபவிக்க வேண்டும் என்ற ஆசையை அது தூண்டிவிடும்.

# உங்களது தாய் தந்தையரின் உயர்வான குணங்களை உங்களை வளர்த்தெடுக்க படிக்கவைக்க திருமணம் செய்துகொடுக்க அவர்கள் பட்ட துன்பங்களை உணர்ச்சிப்பூர்வமாக சொல்லிக் கொடுங்கள்.

குடும்பத்தின் மூத்தவர்கள் மீது இனம்புரியாத ஈர்ப்பும் மரியாதையும் உண்டாகும்.

# உங்களைச் சுற்றி நடக்கும் சமூக அரசியல் நடப்புகளை கூட்டல் குறைத்தல் இல்லாமல் சொல்லிக்கொடுங்கள்.

நாளை சமூக களத்தில் எதிர்கொள்ளப்போகும் நெருக்கடிகளை சந்திப்பதற்கு அவர்களை தயார்படுத்தும்.

# மோசமான தோல்விகள் எதார்த்தம் என்றும் அவற்றை சந்தித்து தான் ஆக வேண்டும் என்றும் கற்றுக்கொடுங்கள்.

உங்கள் பிள்ளைகளை வெற்றியாளர்களாக நீங்கள் நிச்சயம் காண்பீர்கள்.

# பசி வறுமை ஏழ்மை இவற்றை அனுபவங்களோடு கண்ணீர் மல்க கற்றுக்கொடுங்கள்.

அதில்தான் பிள்ளைகள் மனிதத்தன்மை பெறுவதற்கான அபூர்வ சூட்சுமம் அடங்கியுள்ளன.

# தர்மம் செய் என்று சொல்லாதீர். மாறாக கைபிடித்து உங்களோடு செய்ய வையுங்கள்.

தர்மம் தலைகாக்கும் தக்க சமயத்தில் உயிர்காக்கும் என்பது உலகம் தோன்றிய காலம் முதல் இருந்து வரும் உண்மை என்பதை மறவாதீர்.

உலகின் எந்த கல்விமுறையிலும் எந்த பாடப்புத்தகங்களிலும் இதை பார்க்க முடியாது. ஆனால் இது தான் உங்கள் பிள்ளைகளுக்கு இப்போதும் எப்போதும் தேவையான பாடமும் பயிற்சியும் படிப்பினைகளும் என்பதை மனதார நம்புங்கள்.

பொன்போல வாய்த்த இந்த ஓய்வு காலத்திலாவது பாடப்புத்தகங்களை சற்று ஒதுக்கி வையுங்கள்.

Admin November 18, 2020 0

Social Awareness

மகாராணியாக இருந்தாலும் நாங்கள் உதவுவதை தடுக்க இயலாது…

பிரிட்டனுக்கு அருகில் அமைந்திருக்கும் அயர்லாந்தை 1845 இல் பெரும் பஞ்சமும் கொள்ளை நோயும் தாக்கியது.அதை உருளைக் கிழங்கு பஞ்சம் என்றும் சொல்லுவார்கள்.

அயர்லாந்து விவசாயிகளிடம் பிரிட்டிஷ் ஏகாதிபத்தியம் உருளைக் கிழங்கை உயர்குடி மக்களின் உணவு என்றும் அதிகமான இலாபத்தை தரும் பயிர் என்றும் வஞ்சகமாக பேசி வலையில் சிக்க வைத்தனர்.

பலவகையான உணவுப் பயிர்கள் பயிரிடப்பட்ட அயர்லாந்தின் நிலங்களில் உருளைக்கிழங்கை பெருமளவில் பயிரிட்டு அதையே மக்களின் முதன்மை உணவாக உட்கொள்ள நிர்ப்பந்தித்தது பிரிட்டிஷ் ஏகாதிபத்தியம்.

ஒற்றைப்பயிர் சாகுபடியால் மண்ணில் ஏற்பட்ட மலட்டுத் தன்மை மற்றும் பல்வேறு காரணங்களால் கடும் பஞ்சமும் கொள்ளை நோய்களும் அயர்லாந்தை சூழந்தது.

கொள்ளை நோயும் கொடும்பஞ்சமும் ஒட்டிப்பிறந்த இரட்டைப் பிள்ளைகள் என்பதை எப்போதும் நாம் மறந்து விடக் கூடாது.

அயர்லாந்தின் பஞ்சத்திலும் அடுத்து தாக்கிய காலரா பெரியம்மை குளிர்காய்ச்சல் போன்ற வைரஸ் நோய்களாலும் ஏறக்குறைய 15 இலட்சம் மக்கள் மாண்டு போயினர். பிரிட்டிஷ் ஏகாதிபத்தியம் வேடிக்கை பார்த்துக் கொண்டே அயர்லாந்தில் மிச்சம் மீதி இருந்த தானியங்களையும் கொள்ளையிட்டுக் கொண்டு சென்றது.

ஏறக்குறைய 20 இலட்சம் மக்கள் அட்லாண்டிக் பெருங்கடலை கடந்து அமெரிக்கா கனடா ஆஸ்திரேலியா போன்ற நாடுகளுக்கு உயிர்பிழைக்க ஓடினர். உலகம் முழுவதும் அயர்லாந்து மக்களுக்கு உதவிட அன்று வேண்டுகோள் விடுக்கப்பட்டது.

அயர்லாந்தில் விளைந்த அனைத்தையும் சுருட்டிக்கொண்டு பஞ்சத்தை முன்னின்று உண்டாக்கிய பிரிட்டிஷ் ஏகாதிபத்தியத்தின் ராணி விக்டோரியா அம்மையார் வெறும் 2000 பவுண்டுகள் மட்டுமே உதவித்தொகை அறிவித்தார்.

துருக்கி உதுமானிய கிலாஃபாத்தின் கலீஃபா அப்துல் மஜீத் அவர்களுக்கு செய்தி வருகிறது. அயர்லாந்து மக்களின் பஞ்சம் போக்க 10,000 ஸ்டெர்லிங் பவுண்டுகள் உதவித் தொகையாக அறிவித்தார். விக்டோரிய மஹாராணி ஆடிப்போய்விட்டார்.

உடனே உதுமானிய கிலாஃபத்தின் தலைநகர் கான்ஸ்டான்ட்டி நோபிளில் பிரிட்டிஷ் பேரரசின் தூதராக இருந்த ஹென்றி வெல்லஸ்லி கலீஃபாவிடம் சென்று மகாராணியை விட நீங்கள் கூடுதலாக அறிவிக்க கூடாது அதில் பாதியை மட்டும் அறிவியுங்கள் என்று அழுத்தம் கொடுத்தார் .

உதுமானிய கலீஃபா அப்துல் மஜீத் அவர்களும் ஆரம்பத் தொகையாக 1000 ஸ்டெர்லிங் பவுண்டுகளை அனுப்பிவிட்டு பிரிட்டிஷ் கடற்படைக்கு தெரியாமல் 3 பெரிய கப்பல்களில் உணவுப் பொருட்கள் மருந்து பணம் ஆகியவற்றை அயர்லாந்து மக்களுக்கு அனுப்பி வைத்தார்.

மக்கள் பசிபட்டினியால் மடிந்து கொண்டிருந்த நேரத்தில் துருக்கிய கப்பல்கள் அயர்லாந்தின் ட்ராகேதா (Drogheda) துறைமுகத்திற்கு வந்து சேர்ந்தன. ஆயிரக்கணக்கான உயிர்கள் காப்பாற்றப்பட்டன. பெண்கள் பிள்ளைகள் ஆனந்தம் அடைந்தனர். அதன் உச்சமாக துருக்கிய மாலுமிகளை ஐரிஷ் இளம் பெண்கள் பலர் திருமணம் செய்ய முன்வந்தனர். மாலுமிகள் அதை மட்டும் மறுக்கவே யில்லை.உடனே ஓகே சொல்லி திருமணம் செய்துகொண்டனர் .

உயிர்காத்து உதவிய கலீஃபா அப்துல் மஜீத் அவர்களுக்கு அயர்லாந்து மக்களிடமிருந்து ஏராளமான பாராட்டுக் கடிதங்கள் வந்து குவிந்தன.

Freeman’s Journal என்ற அயர்லாந்தின் பழம்பெரும் இதழில்….

” அவர் முஹம்மதின் கொள்கையில் பிடிப்புள்ள மனிதாபிமானம் கொண்ட கொடையாளி. கிறிஸ்துவைப் பின்பற்றுபவரின் உண்மையான மனப்பான்மையுடன் செயல்பட்டார், மேலும் கிறிஸ்தவர்கள் எனக் கூறும் பலரும் பின்பற்றுவதற்கு ஒரு நல்ல முன்மாதிரி ” என்று எழுதியது.

இரண்டு மூன்று ஆண்டுகள் கழித்து உதுமானிய நிலப்பரப்பின் வடகிழக்குப் பகுதியான கிரீமியாவில் ரஷ்யாவின் படையெடுப்பை தடுப்பதில் உதுமானிய இராணுவத்துடன் துணை நின்ற பிரிட்டிஷ் படையில் அயர்லாந்தைச் சேர்ந்த செவிலியர்கள் பொறியாளர்கள் படைவீரர்கள் என்று 30 ஆயிரம் பேர் தன்னார்வத்துடன் பங்கேற்று தங்களது நன்றிக் கடனை செலுத்தினர்.

அதோடு விட்டார்களா அயர்லாந்து வாசிகள் உலகம் முழுவதும் இஸ்லாத்திற்கு எதிரான வெறுப்பு பிரச்சாரங்கள் உச்சத்தில் இருக்கும் இன்றைய காலத்தில் கலீஃபாவின் உதவிப்பொருட்கள் வந்திறங்கிய அயர்லாந்தின் துறைமுக நகரான ட்ராகேதா (Drogheda) நகரின் கொடியிலும் கால்பந்து அணியின் சின்னத்திலும் சிலுவையுடன் உதுமானிய பேரரசின் சின்னமான செம்பிறையை இணைத்து இருதரப்பு உறவுகளையும் வலிமைப் படுத்தியுள்ளனர்.

உதுமானிய கிலாஃபத் 1924 இல் காணாமல் போனபிறகும் இன்று வரை துருக்கியோடு அயர்லாந்து மக்களும் அரசும் இணைந்து நிற்கின்றனர்.

நிர்கதியாக நிற்கும் உயிர்களுக்கு செய்யும் உதவிகளுக்கு பிரதிபலனை எதிர்பார்ப்பது முஸ்லிம்களின் இயல்பாக ஒருக்காலும் இருக்க முடியாது.ஆனால் பிறர் செய்த உதவிகளுக்கு என்றென்றும் நன்றியோடு இருப்பது முஸ்லிம்களின் இயல்பாகவே இருத்தல் வேண்டும் என்பது நபி (ஸல்) அவர்களின் வாக்கு.

——————————————

Sources: Christine Kinealy, Charity and the Great Hunger in Ireland: The Kindness of Strangers (New York: Bloomsbury, 2013), 115-119. | David Murphy, “Ireland and the Crimean War 1854-6,” History Ireland 11 (2003), 34-38.

Admin November 18, 2020 0

Social Awareness

நமது சமூக வாழ்வை மறுபரிசீலனை செய்யும் நேரம் இது.

1857 க்கு முன்பாக இந்தியா முழுவதும் வியாபித்திருந்த அரபு மதரஸாக்களின் பாடத்திட்டத்தில் வேளாண்மை, உணவு, மருத்துவம் இவை கட்டாயப் பாடமாக இணைக்கப்பட்டிருந்தது. 10 ஆண்டுகள் கல்வி காலம் முழுமையாக முடித்த பட்டதாரிகளான ஆலிம்கள் அனைவரும் மார்க்க சட்டங்களை சொல்வதற்கு மட்டுமல்ல மருத்துவம் பார்ப்பதற்கும் அரசின் அங்கீகாரம் பெற்றவர்களாக வெளிவந்தனர்.

இந்தியா முழுவதும் உள்ள பள்ளிவாசல்களில் பணிநியமனம் பெற்ற ஆலிம்கள் தங்களது சொற்பொழிவுகளில் உடல்நலத்தின் அவசியத்தையும் நோய்எதிர்ப்புத் திறனின் முக்கியத்தையும் அறிவியல் பூர்வமாக மக்களுக்கு பயிற்றுவித்தனர். காலை மாலை நேரங்களில் சாதிமத வேறுபாடு இல்லாமல் யுனானி மருத்துவத்தின் ஏறக்குறைய 20 வகையான சிகிச்சை முறைகளை (Therapies) கொண்டு மக்களில் தேவையுடையோருக்கு பள்ளி வளாகத்திலேயே சிகிச்சை அளித்தனர்.

இறைவனின் விருப்பத்திற்குரிய பிரதிநிதியான மனிதனுக்கும் அவனுக்குத் துணையாக சிலபோது உணவாக படைக்கப்பட்டுள்ள கால்நடைகளுக்கும் மருத்துவ சிகிச்சை அளிப்பதை எல்லாம் வல்ல இறைவனுக்கு செய்யும் வணக்கங்களில் ஒன்றாக ஆலிம்கள் கருதினர். அன்றாட வழிபாடுகளோடு இந்த வணக்கத்தை நிறைவேற்றுவதும் மஹல்லா ஜமாத்தின் முக்கிய பொறுப்புகளில் ஒன்றாக அது முஸ்லிம்களின் அழகிய வாழ்வியலோடு ஒன்றுகலந்திருந்தது.

ஊர்மக்களில் யாருக்காவது உடல்நல கோளாறு ஏற்பட்டால் பள்ளிவாசலுக்குத் தான் முதலில் வருவார்கள். பலநூறு ஆண்டுகளாக தொடரும் இந்த வழக்கத்தின் மிச்சசொச்சம் தான் இன்றும் காலை மாலை வேலைகளில் மக்கள் பள்ளிவாசலுக்கு வரும் காட்சிகள்.

நமது அறியாமையால் முயற்சியின்மையால் விட்டுப்போன இந்த உயர்வான கலாச்சாரத்தை மெல்ல மெல்ல மீட்டெடுக்கும் வேலைகளை நாம் துவங்க வேண்டும்.

இடவசதிமிக்க மஹல்லா பள்ளிவாசலில் ஒரு சித்தா அல்லது யுனானி இலவச சிகிச்சை மையத்தை மிகச்சிறிய அளவில் துவங்கினால் போதும். அதுதான் மறுமலர்ச்சிக்கான முதல் வெளிச்சம். சில ஆண்டுகளில் அதை ஆண்கள் அல்லது பெண்கள் அரபு மதரஸாவோடு இணைந்த ஒரு ஆயுஷ் மருத்துவக்கல்லூரியாக உருவாக்கிட வேண்டும் என்ற தொலைநோக்கு சமூக இலக்கில் உறுதியாக இருக்க வேண்டும்.

விமர்சனங்களை தாங்கிக் கொள்ளும் விசாலமனதுடைய ஒருசிலரால் மட்டுமே இந்த பூமியில் வரலாற்றுச் சாதனைகள் நிகழ்த்தப்படுகின்றன. இறைபொருத்தத்திற்காக மட்டுமே என்ற உயர்ந்த மனதுடைய ஒன்றிரண்டு தனவந்தர்கள் முன்வந்தால் போதும் அது தமிழக முஸ்லிம்களுக்கு மகத்தான முன்மாதிரியாக மாறிவிடும். பொதுமக்களின் உடல்நலம் பாதுகாக்கப்பட்டு சொத்துக்கள் பறிபோகமால் காப்பாற்ற முடியும்.

மனிதசமூகத்தில் அறிவு வளர்ச்சியும் அறிவியல் முன்னேற்றங்களும் ஆட்சி மாற்றங்களும் எதார்த்தமானவை. அவை மாறிக்கொண்டே இருக்கும். அந்த மாற்றங்களை தங்களின் கலாச்சார தனித்தன்மைக்கு ஏற்ப உள்வாங்கி நம்மை மேம்படுத்திக் கொண்டே இருப்பது தான் பின்தொடருதல் (Followers) என்ற நிலையிலிருந்து முன்னிலை வகித்தல் (Leaders) என்ற இஸ்லாமிய இயல்புநிலைக்கு உம்மத்தை மாற்றும்.

இப்போது நெருக்கடியான காலமாக மாறிவிட்டது, நீண்டகால திட்டங்களுக்கு அவகாசம் இல்லை என்ற கருத்தை அதிகமாக உபயோகிப்பதற்கு முஸ்லிம்களுக்கு அனுமதியில்லை.

நாளையே பூமி அழிந்துவிடும் என்று தெரிந்தாலும் நம்பிக்கையோடு இன்று ஒரு மரத்தை நடுங்கள் என்பது அகலத்தின் அருட்கொடையான எம்பெருமானார் (ஸல்) அவர்களின் சத்திய செய்தி.

செவிமெடுத்தோம் கட்டுப்பட்டோம்.அதுதான் நமது வேலை.

Admin November 18, 2020 0

Social Awareness

சிட்டுக் குருவிகளை கொண்டு படைத்தவன் பாடம் நடத்துகிறான்.

17 ஆம் நூற்றாண்டு துவங்கி கடந்த 400 ஆண்டுகளாக கோடிக்கணக்கான மலேரியா நோயாளிகளை காப்பாற்றிய குயினின் (quinine) என்ற மருந்து சின்கோனா என்ற மரத்தின் பட்டையிலிருந்து எடுக்கப்பட்டது.

குயினின் மருந்தின் இரசாயன வடிவம் தான் இன்றைய உலக நாடுகள் Covid – 19 வைரஸை எதிர்கொள்வதற்கு அதிவேகமாக உற்பத்தி செய்யும் ஹைட்ராக்ஸிகுளோரோகுயின் (Hydroxychloroquine) என்ற மருந்து. 1970 இல் தான் இதை முழு இரசாயன மருந்தாக மாற்றி உருவாக்கினார்கள்.

1860 இல் நீலகிரி மாவட்டத்தில் மலேரியா நோய் வேகமாகப் பரவியது. இதனால் ஏராளமானோர் உயிரிழக்கவும் செய்தனர். சின்கோனா மரப் பட்டையிலிருந்து தயாரிக்கப்படும் குயினின் மருந்து, மலேரியா நோயைக் கட்டுப்படுத்தும் ஆற்றல் கொண்டது என்பதை அறிந்த ஆங்கிலேயர்கள், தென்னமெரிக்காவின் ஆண்டிஸ் மலைத்தொடரில் விளைந்த சின்கோனா என்ற தாவரத்தை தமிழகத்தின் ஊட்டியில் உற்பத்தி செய்ய முடிவு செய்தனர்.

1864 இல் மலேரியா காய்ச்சல் உலகையே சூறையாடிய காலனி ஆதிக்க காலத்திலும், இரண்டு உலகப்போர் காலத்திலும் ஐரோப்பிய நாடுகளுக்கு இடையே இந்த சின்கோனா மரச்செடிகளுக்காக கடும் சண்டைகள் நடைபெற்றுள்ளன.

மலேரியா வைரஸை எதிர்க்கும் குயினின் என்ற இந்த மருந்து சின்கோனா மரத்தில் மட்டுமல்லாது இன்னும் ஏராளமான மரங்களில் செடிகளில் அந்தந்த நாடுகளுக்கேற்ப மக்களின் தேவைகளுக்கேற்ப யாரும் பயிரிடாமலேயே முளைத்திருக்கும் என்பது இறைவனின் ஏற்பாடு. எல்லா இயற்கை ஆர்வலர்களின் கருத்தும் அது தான்.

மாமேதை இமாம் ஷாஃபிஈ (ரஹ்) அவர்கள் ; மரங்களில் காய்களில் பட்டைகளில் வேர்களில் மனிதனுக்கு ஏற்படும் பல நோய்முடிச்சுகளை அவிழ்க்கும் ரகசியத்தை அல்லாஹ் மறைத்து வைத்துள்ளான் அதை ஆய்ந்தறிவது இஸ்லாமிய கல்வியில் மூன்றில் ஒரு பாகம் என்று கூறினார்கள்.

ஆய்வுகளின் மூலம் மட்டுமே இவற்றை மனிதர்களால் அறிந்துகொள்ள முடியும். ஆனால் பறவைகளுக்கும் விலங்குகளுக்கும் படைக்கும் போதே அல்லாஹ் கற்றுக் கொடுத்துள்ளான்.

1998 இல் கல்கத்தாவில் மலேரியா காய்ச்சல் கடுமையாக பரவியது. பறவையியல் ஆய்வாளர் முனைவர் சுஷிம் சென்குப்தாவும் அவரது குழுவினரும் சிட்டுக்குருவிகளை ஆய்வு செய்தனர்.

பொதுவாக வேப்ப மர குச்சிகளில் கூடு கட்டும் சிட்டுக் குருவிகள் கல்கத்தாவில் மலேரியா காய்ச்சல் பரவிய காலத்தில் அவை Paradise Flower Tree (Caesalpina Pulcherrima) (செம்மயிற்கொன்றை) என்ற மரத்தின் நரம்புகளை வைத்து கூடு கட்டுவதையும் அதன் இலைகளை உண்டு மலேரியா தாக்குதலிலிருந்து தங்களை காத்துக் கொண்டதையும் கண்டறிந்தார்.

மேற்கண்ட தகவல்கள் மூலம் நாம் புரிந்து கொள்ள வேண்டிய செய்திகள் என்னவென்றால் இன்றைக்கு நமது கல்விமுறையில் ஏற்பட்ட கோளாறு காரணமாக பிள்ளைகள் உயிரியல் பாடத்தை எதற்காக ஏன் படிக்க வேண்டும் என்ற புரிதல் இல்லாமலேயே படிக்கின்றனர்.

சிட்டுக் குருவிகளுக்கு மலேரியா மருந்தை கற்றுக்கொடுத்தது யார்…..? மனிதர்களுக்கு நெருக்கமாக வாழும் பறவையாக சிட்டுக் குருவிகளை ஏன் படைத்துள்ளான்….?

இந்த பூமியில் நம்மோடு வாழும் சக உயிரினங்களில் நமக்கான பாடங்களும் வழிகாட்டுதலும் என்ன இருக்கிறது என்பதை இறைவனது கருத்தில் நின்று புரிந்து கொள்ளும் மத்திய காலத்து உயிரியலாளர்கள் மற்றும் மருத்துவர்களின் வழக்கம் நம்மிடம் இன்று அறவே இல்லாமல் போய்விட்டது.

————————————–

Source :

https://medium.com/…/the-global-history-of-the-world-s…

https://malariajournal.biomedcentral.com/…/1475-2875-10…

https://www.newscientist.com/…/mg15721154-300-in-brief…/

The Hidden Powers of Animals: Uncovering the Secrets of Nature – Dr. Karl P. N. Shuker.

Admin November 18, 2020 0

Uncategorized

அச்சமும் அழுகையும் தீர்வை தராது.

அரசமைப்பு சட்டத்தை வடிவமைப்பு செய்த அரசியல் சாசன அவையில் (Constituent Assembly) இடம் பெற்றிருந்த ஒவ்வொருவருக்கும் ஒரு மறைமுகத் திட்டம் (Hidden Agenda) இருந்தது.

ஆனால் இந்தியாவின் அடையாளம் மதச்சார்பின்மையும் சமஉரிமையுமாக இருத்தல் வேண்டும் என்ற உயர்வான பிடிவாதத்தில் காந்தி நேரு அம்பேத்கர் ஆசாத் போன்ற தேசியத் தலைவர்கள் உறுதியாக இருந்த காரணத்தால் சாசன அவையில் இருந்த அனைவரும் தங்களது மறைமுக திட்டங்களில் சிலவற்றை மட்டும் விட்டுக்கொடுக்க வேண்டிய நிலை ஏற்பட்டது.

உலக ஜனநாயக அமைப்பில் உயர்வான அரசமைப்பு சட்டம் நடைமுறையில் உள்ள நம் நாட்டில் மதத்தை சாதியை கலாச்சாரத்தை காரணம் காட்டி ஒரு சமூகம் ஒதுக்கப்படுகிறது என்றல் அது ஒதுக்க முயற்சிப்பவர்களின் குற்றமல்ல.

ஆட்சி அமைக்கும் உரிமைகளும் உயர் அதிகாரத்தை பெறுவதற்கான வாய்ப்புகளும் குடிமக்கள் அனைவருக்கும் பொதுவானது என்பது அரசமைப்பு சட்டத்தின் மூலவிதி.

வெறுப்பு பிரச்சாரம் உருவாக்கிய பொதுப் புத்தியிலான கருத்துக்களை அரசு அதிகாரிகளும் ஊடகங்களும் கட்டுப்பாடின்றி வெளியிடுகின்றனர் என்றால்…

அவர்கள் அமர்ந்திருக்குக்கும் அதிகாரமிக்க இடங்களுக்கு நமது பிள்ளைகளை உருவாக்குவதும் நம்மோடு சேர்த்து மதச்சார்பின்மை மீது நம்பிக்கையுள்ள பிள்ளைகளை உருவாக்குவதும் தான் முடிவான தீர்வாக அமையும்.

முடிவான தீர்வை நோக்கி முன்னேறாமல் அதற்கான அதிகப்படியான தியாகங்களை செய்யாமல் அழுது புலம்புவது மட்டுமே தொடருமானால்…. ஆபத்தான காரியங்களை அலட்சியமாக கருதினார்கள் என்ற வரலாற்றுப் பழியை நம் பிள்ளைகள் நம்மீது சுமத்துவார்கள்.

Admin November 18, 2020 0

ஆன்றோர் சான்றோர்களை ஆய்வுக் கண்ணோட்டத்துடன் அணுகும் முறையே இஸ்லாமிய முறை.

இப்படி பேசுபவர்களை நாம் எப்போது உருவாக்கப் போகிறோம்.

பிள்ளைகளுக்கு கதை சொல்லுங்கள்.

நமது சிந்தனைக்குத் தீனி யாரிடமிருந்து வருகிறது.

வரலாறு முக்கியம் மக்கா…

தயவு கூர்ந்து பிள்ளைகளுக்கு பாடப்புத்தகங்களை நடத்தாதீர்.

மகாராணியாக இருந்தாலும் நாங்கள் உதவுவதை தடுக்க இயலாது…

நமது சமூக வாழ்வை மறுபரிசீலனை செய்யும் நேரம் இது.

சிட்டுக் குருவிகளை கொண்டு படைத்தவன் பாடம் நடத்துகிறான்.

அச்சமும் அழுகையும் தீர்வை தராது.

Tamilnadu Muslim Kalvi Iyakkam

QUICK ACCESS

About Us

Articles

Gallery

Events

career counselling

Map