இன்றைய முஸ்லிம் சமூகத்தி்ன் பொருளாதார வளர்ச்சிக்கு இஸ்லாமிய நிதியியல் (Islamic Finance) படிப்பும் அதில் ஆராய்ச்சியும் மிகவும் அவசியமாக இருக்கிறது. இந்த படிப்பு தமிழக பல்கலைக்கழகங்களில் இல்லை.

அரபுநாடுகள் மலேசியா இந்தோனேசியா அமெரிக்க ஐரோப்பிய நாடுகளில் ஏராளமானவர்கள் இஸ்லாமிய நிதியியல் துறையில் பட்டம் பெற்று ஆராய்ச்சிப் படிப்பை முன்னெடுத்து வருகின்றனர்.

இந்திய மற்றும் பன்னாட்டு நிறுவனங்களுக்கு ஹலால் முதலீடுகள் மற்றும் பங்கு வர்த்தகம் குறித்த ஆலோசனைகளை அவர்கள் தான் வழங்குகின்றனர்.

இந்திய பங்குச்சந்தையில் பட்டியலிடப்பட்டுள்ள 54 % நிறுவனங்கள் ஹலால் பங்குகளை வழங்குகின்றன.

ஹலால் பங்குகளில் உள்நாட்டு வெளிநாட்டு முஸ்லிம்களின் முதலீடுகள் அதிகரிக்கிறது என்பதாற்காக பல இந்திய நிறுவனங்கள் தங்களது தொழில் முறைகளை ஷரிஆ ஆலோசனை வட்டத்துக்குள் கொண்டு வந்துள்ளன.

தமிழ்நாடு முஸ்லிம் கல்வி இயக்கம் ஏற்பாடு செய்துள்ள இந்த ஒருநாள் பயிலரங்கம் இஸ்லாமிய நிதியியல் மற்றும் இந்திய சவூதி ஹலால் பங்குச்சந்தை குறித்த அடிப்படையான புரிதலை வழங்கும்.

முன்பதிவு செய்வதற்கு நாளை கடைசிநாள்.

முன்பதிவுக்கு : 97892 34073

பெற்றோர்களே…

பள்ளி கல்லூரிப் பாடங்கள் உங்கள் பிள்ளைகளுக்கு தகவல்களை கொடுக்கும்.

சமூகநீதி முரசு மாதஇதழ் அவர்களுக்கு உயர்கல்வி மற்றும் ஆராய்ச்சி ரீதியாக பயணிக்க வேண்டிய திசையை காட்டி பயிற்சியும் அளிக்கும்.

உம்மத்தின் அடுத்த தலைமுறையை ஆளுமைமிக்க அதிகாரமிக்க தலைமுறையாக்கும் இலக்குடன் பயணிக்கும் தமிழ்நாடு முஸ்லிம் கல்வி இயக்கத்தின் மாதஇதழ்.

முஸ்லிம் உம்மத்தின் கல்வி மற்றும் வரலாறு சார்ந்த அனைத்து உண்மைகளும் உங்கள் வீடு தேடிவர இன்றே சந்தா செலுத்துங்கள்.

– CMN SALEEM

ஈரோடு மாவட்ட முஸ்லிம் அசோசியேசன் சார்பில் மீலாது விழா மற்றும் சிந்தனையாளர் பழ.கருப்பையா அவர்கள் எழுதிய “அல்லா வடிவமைத்த அழகிய சமூகம்” என்ற நூல் வெளியீட்டு விழாவும் சிறப்பாக நடைபெ‌ற்றது.

ஈரோடு மக்கள் சிந்தனைப் பேரவையின் தலைவர் த.ஸ்டாலின் குணசேகரன் அவர்களுடன் நானும் சிறப்பு அழைப்பாளர்களாக கலந்து கொண்டோம்.

ஈரோட்டின் உலமாக்கள் சமுதாயப் புரவலர்கள் சமுதாய அமைப்புகளின் பொறுப்பாளர்கள் உள்ளிட்ட ஏராளமானோர் இந்நிகழ்வில் கலந்து கொண்டு அண்ணன் பழ.கருப்பையா அவர்களின் முயற்சியை கண்ணியப்படுத்தினர்.

பெருமானார் (ஸல்) அவர்கள் குறித்தும் இஸ்லாமிய நாகரிகம் குறித்தும் முஸ்லிம் அல்லாத அறிஞர்களின் ஆக்கங்கள் பேச்சுக்கள் வெளிவந்து கொண்டே இருக்க வேண்டும். அதை ஊக்குவிக்கும் விதமாக இந்த விழா சிறப்பாக ஏற்பாடு செய்யப்பட்டிருந்தது.

இஸ்லாம் குறித்தும் முஸ்லிம்களின் வாழ்வியல் குறித்தும் எழுதப்படும் ஆய்வு நூல்களின் வழியாகத் தான் பிற சமுதாய அறிஞர்களிடம் அரசியல் தலைவர்களிடம் அரசு அதிகாரிகளிடம் ஒரு நல்ல புரிதலை ஏற்படுத்த முடியும்.

இலக்கிய விழாக்கள் குறைந்தால் எதிர்ப்பும் வெறுப்பும் மக்களிடம் அதிகரிக்கும். வாசிப்பு குறைந்த போனால் மக்களிடம் அடிமைத்தனம் அதிகரிக்கும்.

உலகக்கோப்பை கால்பந்தாட்ட போட்டி 2034 இல் சவூதி அரேபியாவில் நடைபெற உள்ளது.இந்த வாய்ப்பை பெருமைமிக்கதாக கருதும் சவூதி அரசாங்கம் 21 ஆம் நூற்றாண்டின் மிகப்பெரிய நிகழ்வாக இதை நடத்திக் காட்ட வேண்டும் என்ற சூளுரையுடன் ஏற்பாடுகளை துவங்கியுள்ளனர்.

அடுத்த பத்தாவது ஆண்டில் நடைபெற உள்ள இந்த உலகத் திருவிழாவுக்கான கட்டமைப்புப்பணிகள் நடைபெற்று வருகின்றன.

ஏற்கனவே உள்ள 15 கால்பந்தாட்ட மைதானங்களின் புனரமைப்புப் பணிகள் துவங்கப்பட்டு புதிதாக 11 உலகத்தரமான மைதானங்களும் கட்டப்படவுள்ளன.

ரியாத், ஜித்தா,அபஹா,கோபர், நியோம் ஆகிய நகரங்களில் 48 நாடுகள் பங்கேற்கும் 104 போட்டிகள் நடைபெற உள்ளன.

2022 இல் கத்தார் நாடு சுமார் ரூ.20 இலட்சம் கோடி செலவிட்டதாக தகவல்கள் கூறுகின்றன.நிச்சயமாக அதைவிட கூடுதலாகத் தான் சவூதி அரசாங்கம் செலவு செய்யும்.

கட்டுமானம்,பொறியாளர்கள்,வடிவமைப்பாளர்கள், தகவல் தொழில்நுட்பம், ரியல் எஸ்டேட், தனியார் தங்குமிடங்கள்,கஃபே, உணவகம்,போக்குவரத்து, பாலைவன பயணங்கள் உள்ளிட்ட எண்ணற்ற துறைகளில் ஏராளமான தொழில் வாய்ப்புகள் உருவாகி வருகின்றன.

குறிப்பாக MSME என்ற சிறு குறு நடுத்தர வகை தொழில்களில் கணிக்க இயலாத வாய்ப்புகள் உருவாகியுள்ளன.

இந்த சந்தர்ப்பத்தை திறமையானவர்கள் துணிச்சலாக முடிவெடுப்பவர்கள் தளராத உழைப்பாளிகள் தொழில் சாம்ராஜ்யங்களை கட்டமைக்கும் வேட்கையுடையவர்கள் மிகச்சரியாக பயன்படுத்திக் கொள்வார்கள்.

அதேநேரம் எந்தெந்த துறைகளில் நமக்கான தொழில் முதலீட்டு வாய்ப்புகள் உருவாகி வருகிறது என்பதை வல்லுநர்கள் மூலம் கண்டறிந்து அந்த துறைசார்ந்தவர்களுக்கு பயிற்றுவிக்கும் வேலைகளை முஸ்லிம் சமுதாய அமைப்புகள் முன்னெடுக்க வேண்டும்.

சமுதாய அமைப்புகள் அடுத்த பத்தாண்டுகளுக்கு இதையே முழு ஈடுபாட்டுடன் செய்தால் சவூதியில் வாழும் தமிழக முஸ்லிம்களிலிருந்து மிகச்சிறந்த தொழில் ஆளுமைகள் உருவாகி வருவார்கள்.

எதிர்காலத்தில் அவர்கள் அரபுலக ஆட்சியாளர்களுடன் இணைந்து தொழில் செய்யும் சூழல் உருவாகலாம்.

சிந்தனை மாற்றமே சமூக மாற்றம்.

-CMN SALEEM

Civil, Architecture படித்தவர்கள், கட்டுமானத் தொழிலில் நீண்ட கால அனுபவங்களின் அடிப்படையில் பயணிப்பவர்கள், நாட்டில் ஏற்பட்டு வரும் மாற்றங்களையும் மக்களின் எதிர்பார்ப்புகளையும் துல்லியமாக அறிந்துகொள்ளும் முயற்சிகள் தான் இவர்களின் தொழில் வளர்ச்சிக்கான மூலாதாரம்.

காட்டுமானத் தொழிலில் ஈடுபட்டுள்ள முஸ்லிம்கள் அனைவரும் ஒரு அமைப்பாக இயங்கினால் மட்டுமே இது சாத்தியப்படும்.

பல்வேறு பொது அமைப்புகளில் அங்கம் வகிக்கும் அதேநேரம் முஸ்லிம் கட்டுமான நிறுவனங்கள் பொறியாளர்கள் வடிவமைப்பாளர்கள் தங்களது சமூகத்தவர் மட்டுமே அங்கம் வகிக்கும் ஒரு அமைப்பை கட்டாயம் அமைத்துக் கொள்ள வேண்டும்.

பொது அமைப்புகள் கட்டுமானத் தொழிலை இலாபகரமாக செய்வதற்கும் உரிமை மீறல்களுக்கும் மட்டுமே ஆலோசனைகள் வழங்க முடியும்.

முஸ்லிம் கட்டுமான நிறுவனங்களின் அமைப்பினால் மட்டுமே தங்களது தொழிலை ஹலாலாகவும் பரக்கத்தாகவும் இலாபகரமாகவும் செய்வதற்கு பயிற்சியளிக்க முடியும்.

இலாபத்துக்கும் பரக்கத்துக்கும் எல்லையில்லா வேறுபாடுகளும் எக்கச்சக்கமான பலன்களும் உள்ளதை ஆன்மிகமாக உணர்ந்து கொள்ள வேண்டும்.

அதேபோல காலத்துக்கேற்ற தொழில்நுட்பங்களையும் நவீன கட்டுமானப் பொருட்களையும் கண்டறிவதற்கான முயற்சிகளுக்கு Civil, Architecture, Islamic Architecture, Soil Science, Building Information Modeling, Construction Management, 3D printing, Automation and Robotics , Green construction,போன்ற நவீன பிரிவுகளில் தகுதிவாய்ந்த மாணவர்களை தேர்வு செய்து அவர்களின் ஆராய்ச்சிக் கல்விக்கான செலவுகளை ஒப்பந்தத்தின் அடிப்படையில் இந்த அமைப்பு பொறுப்பேற்றுக் கொள்ள வேண்டும்.

இதனால் கட்டுமானத் தொழிலில் உருவாகிவரும் புதிய வாய்ப்புகள் நவீன தொழில்நுட்பம் பசுமை காட்டுமானப் பொருட்கள் குறித்த தகவல்களும் தொழில் திட்டங்களும் இடைவெளி இல்லாமல் கிடைத்துக் கொண்டிருக்கும்.

முஸ்லிம் கட்டுமான நிறுவனங்கள் சர்வதேச அளவில் விரிவாக்கம் அடைந்திட இந்த R&D பிரிவு இன்றியமையாதது.

சமீபகாலமாக அறிவு வளமிக்க உம்மத்தின் பிள்ளைகள் Civil , Architecture, Structure , Environment போன்ற படிப்புகளில் ஆராய்ச்சிக் கல்வியை (PhD) முன்னெடுத்து வருகின்றனர் என்ற மறுமலர்ச்சியான செய்தியையும் இங்கே பதிவிட விரும்புகிறேன்.

ஆராய்ச்சி மற்றும் வளர்ச்சிக்கான பிரிவு (R&D -Research and development wing) எந்த நிறுவனத்தில் எந்த சமூகத்தில் வலிமையாக கட்டமைக்கப்படுகிறதோ அந்த நிறுவனமும் சமூகமும் எப்போதும் வளர்ச்சிப் பாதையிலேயே இருக்கும். அவர்கள் சார்ந்துள்ள துறையில் அவர்களே முன்னவர்களாகவும் தலைவர்களாகவும் இருப்பார்கள்.

– CMN SALEEM

புதுச்சேரி பைத்துல் ஹிக்மா வளாகத்தில் இயங்கிவரும் ஜாமிஅத்துல் ஹிக்மா அரபிக் கல்லூரியில் தேசிய அரசியலமைப்பு தினம் (National Constitution Day) விழா நடைபெற்றது.

இந்திய அரசமைப்புச் சட்டத்தை உருவாக்கிய அரசியல் நிர்ணய சபையில் நடைபெற்ற முக்கிய விவாதங்களை ஆலிமியத் கல்வி பயிலும் மாணவர்கள் அப்படியே காட்சிப்படுத்தினர்.

மாதிரி நீதிமன்றமும் (Moot Court ) நடைபெற்றது.

மூன்று வழக்கறிஞர்கள் நீதிபதிகளாக அமர்ந்திருக்க மாணவர்கள் இரண்டு முக்கிய வழக்குகளை எடுத்து விவாதித்தனர்.

Aalim + Advocate என்பது தான் ஜாமிஅத்துல் ஹிக்மா அரபிக் கல்லூரி மாணவர்களின் இலக்கு.

தமிழ்நாடு முஸ்லிம் கல்வி இயக்கம் முஸ்லிம் பிள்ளைகளுக்கு எதை வலியுறுத்தி வருகிறதோ அதன்படி உருவாக்கியும் வருகிறது.

அல்ஹம்துலில்லாஹ்.

இராமநாதபுரம்,பெருங்குளம் அல் கலம் இன்டர்நேஷனல் பள்ளியில் கல்வி விழிப்புணர்வு மாநாடு நடைபெற்றது.

பள்ளியின் நிறுவனர் ஆஸ்திரேலிய நாட்டின் கிராண்ட் முஃப்தி மெளலானா அப்துல் குத்தூஸ் அஸ்கரி அவர்கள் தலைமையில் நடைபெற்ற இவ்விழாவில் நாடாளுமன்ற உறுப்பினர் நவாஸ் கனி,பேராசிரியர் ஹாஜா கனி ஆகியோருடன் நானும் கலந்து கொண்டேன்.

உயர்ந்த இலக்குடன் இயங்கி வரும் இந்த இன்டர்நேஷனல் பள்ளியை முகவை பகுதி மக்கள் மிகச்சரியாக பயன்படுத்திக் கொள்ள வேண்டும்.

தமிழக கடற்கரை கிராமங்களில் பல முஸ்லிம் குடும்பங்கள் பன்னெடுங்காலமாக மீன்பிடித் தொழில் செய்து வருகின்றனர். இவர்களின் சமூகப் பொருளாதார வாழ்வியல் நிலைகளில் பெரிய முன்னேற்றங்களுக்கு வழியில்லாமல் இருக்கிறது.

இந்த குடும்பங்கள் வாழும் சூழலையும் அவர்களின் பொருளாதார நிலைகளையும் கருதி சில சமூக ஒதுக்குதல் ஆங்காங்கே இருக்கத்தான் செய்கின்றன.

இந்த மீனவ குடும்பங்களில் தற்போது பள்ளி கல்லூரிகளில் படித்துக் கொண்டிருக்கும் பிள்ளைகளின் உயர்கல்விக்கு மிகச்சரியான இலக்கு நிர்ணயித்து ஊக்கப்படுத்தினால் அடுத்த 15 ஆண்டுகளில் பெரும் மாற்றங்களை ஏற்படுத்த முடியும். ஏற்படுத்த வேண்டும்.

இந்த பிள்ளைகளின் மரபணுவில் கடல்சூழல் குறித்த பதிவுகள் உள்ளன. இவர்களின் உயர்கல்வி மற்றும் ஆராய்ச்சியில் கடலியல் (Oceanography) கடல்சார் உயிரியல் (Marine Biology) வானிலையியல் (Meteorology) கடல் வள மேலாண்மை (Marine Resource Management)உள்ளிட்ட படிப்புகளில் ஆராய்ச்சிக் கல்வியை முன்னெடுக்க ஆர்வப்படுத்த வேண்டும்.

அரபுநாடுகளில் இத்தகைய ஆராய்ச்சிப் படிப்புகளுக்கு அரசுப் பல்கலைக்கழகங்கள் அனைத்தும் ஏராளமாக நிதியுதவி செய்கின்றன.

பொருளாதார அதிகாரம் அடைவதற்கும் சமூக அடையாளங்கள் மாறுவதற்கும் உயர்கல்வியும் ஆராய்ச்சியும் தான் வித்து.

மீன்பிடித்தொழில் ஒரு பரக்கத்தான தொழில். அதேநேரம் கடல் ஆராய்ச்சிகள் என்பது அல்லாஹ்வுக்கு உகந்த ஒரு இபாதத்.

மீனவ குடும்பங்கள் மாற்றி சிந்திக்க வேண்டும்.

தமிழக முஸ்லிம்களிடையே முதன்முறையாக இஸ்லாமிய நிதியியல் மற்றும் ஹலால் பங்குச்சந்தை முதலீடுகள் குறித்த ஒருநாள் வகுப்பு பைத்துல் ஹிக்மாவில் நடைபெற்றது.

இந்திய பங்குச் சந்தையில் ஷரீஅத் வகைக்கு உட்பட்ட பங்குகளை எதன் அடிப்படையில் தரம் பிரிப்பது,அதற்கு அறிஞர்களின் வழிகாட்டுதல் என்ன என்பது குறித்து மெளலவி உமர் ஹஸனி அவர்கள் வகுப்பெடுத்தார்கள்.

முதலீடுகள்,நிதி மேலாண்மை,அதற்கான திட்டமிடல் குறித்து நிதித்துறை வல்லுனர் சகோதரர் இம்தியாஸ் அவர்கள் வகுப்பெடுத்தார்கள்.

சவூதி அரேபிய பங்குச் சந்தையில் முதலீடு செய்யும் வழிமுறைகள் குறித்து சவூதி அல்கோபரிலிருந்து சகோதரர் சீனி முஹம்மது அவர்கள் எளிய முறையில் வகுப்பெடுத்தார்கள்.

சர்வதேச அளவில் இஸ்லாமிய வங்கியியல் & நிதி (Islamic Banking and Finance) மேற்படிப்பு மற்றும் ஆராய்ச்சி எங்கெல்லாம் படிக்கலாம் என்பது குறித்த விரிவான தகவல்களை பேராசிரியர் இஸ்மாயில் அவர்கள் விளக்கினார்கள்.

முஸ்லிம்கள் செல்வம் (ஆயுதம்) பெருக்க வேண்டியதின் கட்டாயம் குறித்தும், கல்விநிதியுதவி அளித்து இஸ்லாமிய நிதியியல் வல்லுனர்களை உருவாக்க வேண்டிய கட்டாயம் குறித்தும், உற்பத்தித் தொழில் (Manufacturing Business) சாம்ராஜ்யங்களை உருவாக்கும் இலக்கு குறித்தும் நான் வகுப்பெடுத்தேன்.

தமிழகம் முழுவதிலிருந்தும் ஏராளமான படித்த விவரம் அறிந்த சகோதர சகோதரிகள் ஆர்வத்துடன் கலந்து கொண்டனர்.

முஸ்லிம்களை ஆற்றல்படுத்தி அதிகாரப்படுத்தும் இதுபோன்ற பயனுள்ள பயிலரங்குகளைத் தான் இன்றைய அறிஞர்கள் மற்றும் சமுதாய அமைப்புகளிடமிருந்து முஸ்லிம்கள் அதிகம் எதிர்பார்க்கின்றனர் என்பதை இந்த நிகழ்ச்சி உணர்த்தியது.

ஆராய்ச்சிக் கல்வியும் உற்பத்தி பொருளாதாரமும் இன்றைய காலத்தின் பேராற்றல்மிக்க ஆயுதங்கள் என்பதை நினைவில் கொள்வோம்.

இஸ்லாமிய வரலாற்று ஒளியில் நம் பிள்ளைகளின் உயர்கல்வி மற்றும் ஆராய்ச்சிக்கான இலக்கு என்ற கருத்தியலில் புதுச்சேரி பைத்துல் ஹிக்மவில் ஒருநாள் பயிலரங்கம் நடைபெற்றது.

கோட்டக்குப்பம் இஸ்லாமிக் வெல்ஃபர் சொசைட்டி யில் அங்கம் வகிக்கும் ஆலிமாக்கள் மற்றும் பட்டதாரி மாணவ மாணவிகள் திரளாக கலந்து கொண்டனர்.

ஆண் பிள்ளைகளை ஆராய்ச்சியாளர்களாக உருவாக்குவோம்.

பெண் பிள்ளைகளை கல்வியாளர்களாக உருவாக்குவோம்.

அடுத்த அரைநூற்றாண்டு காலத்துக்கு மஹல்லாக்களில் ஓங்கி ஒலிக்கப்பட வேண்டிய மறுமலர்ச்சிக்கான முழக்கம் இது.

தமிழ்நாடு முஸ்லிம் கல்வி இயக்கத்தின் சார்பில் பெற்றோர்களின் உள்ளங்களில் தொடர்ந்து விதைக்கப்பட்டு வருகிறது.