குடியரசு இந்தியாவின் துவக்க காலத்தில் வாழ்ந்த தமிழக முஸ்லிம்களுக்கு இஸ்லாமிய வரலாறுகள் பாடமாக பயிற்றுவிக்கப்பட்டிருந்தால் இந்நேரம் உம்மத்தில் மறுமலர்ச்சி ஏற்பட்டிருக்கும்.

இந்த நாட்டின் வளர்ச்சியை வழிநடத்துவோரில் முஸ்லிம்களே முதல்நிலை வகித்திருப்பார்கள்.

மிக முக்கியமாக, மார்க்கத்தின் பிரிவு விடயங்களில் உண்டாகும் கருத்து வேறுபாடுகளை தூக்கிப் பிடித்துக் கொண்டு காலம் தள்ளுவோர் கண்டுகொள்ளாமல் விடப்பட்டிருப்பார்கள்.

ஒரு சமூகத்தின் வரலாறும் பகுத்தறிவுமிக்க மரபுகளும் தான் அந்த சமூகம் கரையேறுவதற்கு காரணியாக இருக்கும் கலங்கரை விளக்கு.

அல்லாஹ்வின் கருணையால் கடந்த சில ஆண்டுகளாக உம்மத்தில் முதிர்ச்சியான அணுகுமுறை அதிகரித்து வருகிறது. அறிவு செல்வம் அந்தஸ்த்து போன்ற அமானிதங்களை பெற்றவர்களிடம் இருந்த அகங்கார இறுக்கம் தளர்ந்து வருகிறது.

நாட்டின் சமீபகால சமூக அரசியல் நெருக்கடிகள் இந்த மாற்றத்திற்கு முக்கிய காரணமாக இருக்கின்றன.

வணக்க வழிபாடுகளுடன், இஸ்லாமிய வரலாற்றுப் பின்புலத்தில் நவீனக் கல்வி ஆராய்ச்சி தொழில் செல்வம் பெருக்குதல் போன்றத் துறைகளில் கவனத்தை குவித்து தன்னையும் தனது குடும்பத்தையும் உம்மத்தையும் இந்த நாட்டையும் வறுமை ஏழ்மையிலிருந்து மீட்டு வளர்ச்சிப் பாதையில் கொண்டு செல்லும் ஆக்கப்பூர்வமான பணிகளில் உம்மத்தின் மாணவர்கள் இளைஞர்கள் தங்களை ஈடுபடுத்திக் கொள்கிற போது இந்த மாற்றங்களின் வேகம் அதிகரிக்கும்.

இதுவே ஒரு மூமின் மண்ணறையிலும் மறுமையிலும் வெற்றி பெற்று உயர்ந்த பரிசுகளை பெறுவதற்கான இஸ்லாமிய போட்டித்தேர்வுகள் (Islamic Competitive Exam).

அபுதாலிப்

முத்திம் இப்னு அதி

போன்றவர்களை அடையாளம்

கண்டு கண்ணியப்படுத்துவது

நபிவழி.

————————–

அபுதாலிப்

———

மக்கா நகரத்தின் பெருந்தலைவர். குறைஷிகளில் பனூ ஹாஷிம் பனூ அல்முத்தலிப் ஆகிய மதிப்புமிக்க குடும்பத்தாரின் மூத்த தலைவர்.

தனது தம்பி மகன் முஹம்மது இப்னு அப்துல்லா (ஸல்) அவர்களின் ஏகத்துவ பிரச்சாரத்திற்கு பாதுகாப்பு அரணாக நின்றவர்.அவரின் இறுதிமூச்சு வரையிலும் பெருமானார் முஹம்மது (ஸல்) அவர்களை தனது கண்காணிப்பு வட்டத்துக்குள் வைத்து காத்து நின்ற பலதெய்வ வழிபாட்டாளர்.

குறைஷிகளால் ஊர்விலக்கம் செய்யப்பட்டபோது பெருமானார் (ஸல்) அவர்களுக்கும் முஸ்லிம்களின் வணக்க வழிபாடுகளுக்கும் உறுதுணையாக நிற்பதற்கு, குலதெய்வ வழிபாடு செய்துவந்த தனது ஒட்டுமொத்த குடும்பப் படையையும் ஒன்று திரட்டிய சமூக அரசியல் இராஜதந்திரி (Socio Political Diplomat) அபுதாலிப்.

ஊர்விலக்கத்தின் காரணமாக பெண்கள் குழந்தைகள் பசியினால் இலை தழைகளை உண்டபோதும் கூட பெருமானாருக்கும் ஏகத்துவத்துக்கும் பலதெய்வ வழிபாடுடைய அபுதாலிபின் குடும்பத்தினர் பேராதரவாக நின்றனர்.

முத்திம் இப்னு அதி

—————–

நபித்துவத்தின் 9 ஆம் ஆண்டு. பெருமானார் (ஸல்) அவர்களை அரணாக காத்து நின்ற அபுதாலிப் மறைந்தார். கண் இமை போன்று காத்து நின்ற மனைவி கதீஜா மறைந்தார். பெருமானார் (ஸல்) அவர்கள் மீது தாக்குதல் அதிகமானது.

அடைக்கலம் தேடி அருகிலுள்ள தாயிஃப்க்கு ஓடினார்கள். அங்கும் கல்லால் அடித்து விரட்டப்பட்டார்கள். காலிலும் தலையிலும் இரத்தம் சொட்ட எங்கு செல்வதென்று தெரியாமல் யாரிடம் ஆதரவு கேட்பதென்று தெரியாமல் மீண்டும் ஹீரா குகைக்கே திரும்பினார்கள்.

தன்மானம் பார்க்காமல் மக்காவிலுள்ள சில குறைஷி தலைவர்களிடம் ஆதரவு கேட்டு வளர்ப்பு மகன் ஜைத் இப்னு ஹாரிதா (ரலி) அவர்களை அனுப்பினார்கள். பலரும் மறுத்துவிட்டனர்.கடைசியாக ஒருவர் அடைக்கலம் தர முன்வந்தார்.

அவர் தான் முத்திம் இப்னு அதி.

குறைஷிகளின் பனூ அப்து மனாஃப் குடும்பத்தைச் சேர்ந்தவர்.மக்காவின் மதிப்புமிக்கத் தலைவர். பெருமானார் (ஸல்) அவர்களின் அங்காளி பங்காளி. (தாய் வழி தந்தை வழி உறவு).

ஊர்விலக்கம் செய்யப்பட காலத்தில் பெருமானார் (ஸல்) அவர்களுடன் அபுதாலிப் குடும்பத்தினரும் துன்பப்படுவதை பார்த்து ஊர்விலக்கத்தை அதிகாரப்பூர்வமாக அகற்றிட குறைஷிகளின் நாடாளுமன்றம் தாருந்நத்வா வில் வியூகத்துடன் அணுகிய அரசியல் ஞானி இவர்.

இஸ்லாத்தை ஏற்காமல் கடும் விமர்சனங்களும் செய்து கொண்டிருந்தவர். ஆனால் அடைக்கலம் வேண்டிய பெருமானார் (ஸல்) அவர்களின் கோரிக்கையை ஏற்றார். அபுதாலிப் கதீஜா அம்மையாருக்குப் பிறகு பெருமானாரை மக்காவில் வைத்து பாதுகாத்தவர் இவர். வயதுமூப்பு காரணமாக சில காலங்களில் மரணித்துவிடுகிறார்.

பத்ர் போர்க்களம்.

மக்காவில் தான் நிர்கதியாக நின்ற நேரத்தில் தனக்கு அடைக்கலம் அளித்த முத்திம் இப்னு அதி அவர்களின் புதல்வரும் சகோதரரும் குறைஷி படையின் முதல் வரிசையில் வாளேந்தி நிற்பதை பெருமானார் (ஸல்) அவர்கள் கண்டார்கள்.

அதிர்ச்சியடைந்தார்கள்.என்ன செய்வதென்று தெரியவில்லை. அவர்களுடன் மட்டும் போரிட வேண்டாம் என்று முஸ்லிம்களிடம் கேட்டுக் கொண்டார்கள். ஆனால் அதை அவர்கள் இருவரும் ஏற்காமல் முஸ்லிம்களுடன் போரிட்டனர்.

போரில் முத்திம் இப்னு அதி அவர்களின் சகோதரர் கொல்லப்பட்டார். மகன் சுபைர் இபின் அதி கைதியாக பிடிக்கப்பட்டு மதீனத்து பள்ளிவாசலின் வாயிலிருந்த ஈச்சைமரத்தில் கட்டப்பட்டிருந்தார்.மஃக்ரிப் தொழுதுவிட்டு வந்த பெருமானார் (ஸல்) அவர்கள் சுபைரை பார்த்து இப்படி சொன்னார்கள்..

” குறைஷிகளில் 70 பேர் கொல்லப்பட்டுள்ளனர். உன்னையும் சேர்த்து 70 பேர் போர்க்கைதிகளாக பிடிக்கப்பட்டுள்ளனர்.அவர்களில் செல்வந்தர்களுக்கு பிணையத் தொகையும் கல்வியாளர்களுக்கு கற்பித்தலையும் விடுதலைக்கான நிபந்தனையாக விதிக்கப்பட்டுள்ளது.

இந்த நேரத்தில் உன் தந்தை உயிருடன் இருந்து குறைஷிகள் அனைவரையும் நிபந்தனையின்றி விடுதலை செய்யுங்கள் என்று ஒருவார்த்தை கூறினால் எந்த மறுப்பும் இல்லாமல் அனைவரையும் விடுதலை செய்துவிடுவேன் ” என்று பெருமானார் (ஸல்) அவர்கள் கூறினார்கள்.

குலதெய்வ வழிபாடு செய்பவராகவும், இஸ்லாத்தையும் பெருமானாரையும் கடுமையாக விமர்சனங்கள் செய்பவராகவும் இருந்தும் கூட மிக நெருக்கடியான காலத்தில் தனக்கு அடைக்கலம் அளித்த முத்திம் இப்னு அதி அவர்களுக்கு செய்நன்றி மறவாது கண்மணி நாயகம் (ஸல்) அவர்கள் காட்டிய நன்றியுணர்ச்சி இது.

அபுதாலிப்,முத்திம் இப்னு அதி, துவங்கி இன்றுவரை 1440 ஆண்டுகளில் உலகில் இந்தியாவில் தமிழகத்தில் எண்ணிலடங்கா மாற்று மத தலைவர்கள் அரசர்கள் அறிஞர்கள் மதகுருமார்கள் மற்றும் தமிழகத்தின் குறுநில மன்னர்கள் நிலச்சுவான்தார்கள் திராவிட அம்பேத்கரிய பொதுவுடைமை தமிழ்த்தேசிய இயக்கத் தலைவர்கள் அனைத்து சாதி வழி சமுதாயத் தலைவர்கள் கிராம பெரியவர்கள் உள்ளிடோர், எண்ணிக்கையில் குறைவாக வாழும் முஸ்லிம்களுக்கும் இஸ்லாத்திற்கும் பாதுகாப்பாக பேராதரவாக நின்றுள்ளனர். நிற்கின்றனர். நிற்பார்கள்.

இது அல்லாஹ்வின் ஏற்பாடு.

இவர்களில் சிலர் இஸ்லாத்தையும் முஸ்லிம்களையும் சில காரணங்களுக்காக சில நேரங்களில் விமர்சனம் செய்பவர்களாக கூட இருக்கலாம்.ஆங்காங்கே சிறு சிறு மோதல்கள் கூட நடைபெற்றிருக்கலாம்.தேர்தல் அரசியலில் அணிமாறி கூட பயணித்திருக்கலாம். ஆனால் இஸ்லாத்தின் எதிரிகளை எதிர்கொள்வதில் இவர்கள் முன்வரிசையில் இருப்பதால் அந்த விமர்சனங்களை மோதல்களை பெரிதுபடுத்தாமல் கடந்து செல்லும் பண்பாட்டையும் பக்குவத்தையும் பெருமானார் (ஸல்) அவர்களின் உம்மத்தான நாம் வளர்த்துக் கொள்ள வேண்டும்.

தமிழகத்தின் பொதுவெளிகளிலும், வெளியே தெரியாமல் மூலை முடுக்குகளிலும் வாழும் இந்த அபுதாலிபுகளை முத்திம் இப்னு அதி போன்றோரை அடையாளம் கண்டு கண்ணியப்படுத்துவதும் தோழமையோடு நடந்து கொள்வதும் முஸ்லிம்கள் பின்பற்ற வேண்டிய வாழ்க்கைமுறை என்பது பெருமானார் (ஸல்) அவர்கள் நமக்கு காட்டித்தந்துள்ள வாழ்வியல் பாடம்.

– CMN SALEEM

நாடாளுமன்ற கூட்டுக்குழு இறுதி செய்துள்ள வக்ஃப் சட்ட திருத்த மசோதாவை உச்சநீதிமன்றத்தின் மூலமாக அல்லது ஆட்சி மாற்றத்தின் மூலமாக மட்டுமே அகற்ற முடியும். அப்படியே அகற்றினாலும் அதை வேறொரு வடிவத்தில் கொண்டுவரும் முயற்சிகள் தொடர்ந்து கொண்டே தான் இருக்கும்.

பள்ளிவாசல்கள் மதரஸாக்கள் வக்ஃப் சொத்துக்கள் இவற்றை இந்திய அறக்கட்டளைச் சட்டத்தின் (Religious and Charitable Trust) கீழ் பதிவு செய்து கொள்வது நிரந்தர பாதுகாப்பை (ஓரளவுக்கு) வழங்கும்.

ஆளுமைமிக்க சட்ட வல்லுனர்களின் தேவைகள் அதிகரித்து கொண்டே வருகிறது என்பதை கடந்த 25 ஆண்டுகளாக நாங்கள் கூறி வருவதை கவனத்தில் கொள்ளுங்கள்.

நாம் விரும்பினாலும் இல்லாவிட்டாலும் இனிவரும் ஆலிம்கள் ஜமாஅத் பொறுப்பாளர்கள் தேர்தல் அரசியலில் ஈடுபடும் இளைஞர்கள் உள்ளிட்டோர் கட்டாயம் சட்டம் படித்தவர்களாக இருக்க வேண்டிய நெருக்கடியை காலமும் சூழலும் உருவாக்கிக் கொண்டிருக்கிறது.

அது மட்டுமல்ல. சர்வதேச நீதிமன்றங்களிலும் ஆளுமைமிக்க வழக்கறிஞர்களாக அதிகாரம் பெற வேண்டிய நெருக்கடியும் அதிகரிப்பதை உணர்ந்து கொள்ள வேண்டும்.

-CMN SALEEM

பாஜக அரசு கொண்டுவந்துள்ள வஃக்பு சட்டத்திருத்த மசோதா – 2024 இல் திருத்தங்கள் செய்வதற்காக அமைக்கப்பட்ட நாடாளுமன்ற நிலைக்குழு எதிர்க்கட்சிகளின் பரிந்துரைகள் அனைத்தையும் நிராகரித்து விட்டது.விரைவில் கூடவுள்ள நாடாளுமன்ற கூட்டத்தில் இந்த மசோதா சமர்ப்பிக்கப்படும் என்று எதிர்பார்க்கப்படுகிறது.

நாடு முழுவதும் வெளிப்படையான விவாதப் பொருளாகவும், மறைமுகமாக நடைமுறைப் படுத்தப்பட்டும் வந்த பொது சிவில் சட்டம் முதன்முறையாக உத்தரகாண்ட் மாநிலத்தில் சட்டமாகியுள்ளது.

உணர்ச்சி வசப்படாமல் மக்களை உணர்ச்சி வசப்படுத்தாமல் தொலைநோக்குத் திட்டத்தையும் அர்ப்பணிப்புடன் கூடிய சேவையையும் யார் முன்னெடுத்தாலும் அது நிச்சயம் மாற்றங்களை ஏற்படுத்தும் என்பதற்கு இந்த இரண்டு விரும்பத்தகாத அடைவுகளும் மிகச்சிறந்த உதாரணங்கள்.

இந்த இரண்டு செய்திகளும் சமூக அக்கறையுடைய முஸ்லிம்களுக்கு ஒருவிதமான சங்கடத்தையும் நெருக்கடிகளையும் ஏற்படுத்தும் என்பதில் சந்தேகமில்லை.

எந்த சங்கடத்துக்கு நெருக்கடிகளுக்கும் உள்ளாக வேண்டியத் தேவையில்லை.

இதுபோன்ற அரசியல் மற்றும் சட்ட ரீதியான சிக்கல்களுக்கு நிலையான அறிவுப்பூர்வமான தீர்வுகளை ஆலோசித்து அதை நோக்கி நாம் நகர்வதும் உம்மத்தின் இளைஞர்களை நகர்த்துவதும் நமது இலக்காக மாறினால் வெகுவிரைவில் மிக அழகிய அமைதியான மாற்றங்களை ஏற்படுத்த முடியும்.

ஷரீஅத் மற்றும் சட்டக்கல்வி இந்த இரண்டு துறைகளிலும் கல்வியியல் புலமையுடையவர்களால் (Academic Excellence) மட்டும் தான் இந்த சிக்கல்களின் ஆழத்தையும் விசாலத்தையும் புரிந்து கொள்ளமுடியும்.

அப்படிப்பட்ட வல்லுனர்களின் நியாமான கோரிக்கைகள் வாதங்கள் ராஜ்ய ரீதியான லாபி மற்றும் சட்டப் போராட்டங்களால் மட்டும் தான் இதுபோன்ற நெருக்கடிகளை எதிர்கொள்ள முடியும்.மிக குறைவாக உள்ள நமது மக்கள் தொகை மற்றும் பொருளாதார வளங்களை பயன்படுத்தி நம்மை ஆற்றல்படுத்திக் கொள்ள முடியும்.அதன் மூலம் நிலையானத் தீர்வுகளையும் ஏற்படுத்த முடியும்.

பன்முகத் தன்மையுடைய ஜனநாயக நாட்டில் சட்ட சமூக நெருக்கடிகளை எதிர்கொள்ளும் வழிமுறை என்று நமது அடுத்த தலைமுறைக்கு கற்பிக்கவும் இதுதான் தகுதியுடைய பாடமாகவும் இருக்கும்.

ஒவ்வொரு மதரஸாவிலும் சமுதாய அமைப்பிலும் முஹல்லாவிலும் அதுபோன்ற வல்லுநர்களை உருவாக்குவதற்கு முஸ்லிம்களுக்கு எந்த தடையும் இல்லை

தென்னிந்திய மாநிலங்களில் குழந்தை பிறப்பு விகிதம் குறைந்து மிக ஆபத்தான நிலையை அடைந்துள்ளது. அதில் தமிழகம் முதன்மை இடம் வகிக்கிறது.

தமிழகம் 1.4

ஆந்திரா 1.5

தெலங்கானா 1.5

கேரளா 1.5

கர்நாடக 1.6

————-

பீகார் 3.1

உ .பி 2.7

ம.பி 2.9

குழந்தை பிறப்பு விகிதம் குறைந்தால் முதியோர் எண்ணிக்கை கூடி அவர்கள் ஆதரவற்று விடப்படும் நிலை உண்டாகும்.குடும்பங்கள் ஏழ்மை நிலைக்கு தள்ளப்படும். ஆண்கள் மீது பொருளாதார சுமைகளும் சமூகப் பொருப்புகளும் அதிகரிக்கும்.

தென்னிந்திய மாநிலங்களில் நாடாளுமன்ற உறுப்பினர்கள் எண்ணிக்கை குறைந்து அரசியல் அதிகாரத்திலும் நாட்டின் வளங்கள் பகிர்விலும் பெரும் இடைவெளிகள் உண்டாகும்.

இப்போது கூட வடஇந்திய தொழிலாளர்கள் இல்லாமல் தமிழகத்தில் எந்த தொழிற்சாலைகளும் உணவகங்களும் வேளாண் பணிகளும் இயங்க முடியாது என்ற நிலை உருவாகிவிட்டது.

நாட்டிலேயே முதியோர்கள் அதிகமுடைய மாநிலமாக தமிழகம் இரண்டாம் இடம் வகிக்கிறது.

இது சாதி மதம் கடந்து தமிழ்நாடு தமிழ்ச்சமூகம் என்ற விசாலமான பார்வையில் அணுகப்பட வேண்டிய மிக முக்கியமான நெருக்கடி.

சரியான பருவத்தில் திருமணம் செய்து கொள்வதற்கும் அதிக குழந்தைகள் பெற்றுக் கொள்வதற்கும் திட்டமிட்டு இடையூறு ஏற்படுத்தியதால் சீனா ஜப்பான் கொரியா மற்றும் பல ஐரோப்பிய நாடுகள் இன்று நிலை தடுமாறி நிற்கின்றன.

இயற்கைக்கு எதிரான இந்த கலாச்சாரத்தை இரண்டாம் உலகப் போருக்குப் பிறகு இந்தியாவின் மீதும் திணித்தனர்.அதிக குழந்தைகள் பெற்றுக் கொள்வதை அநாகரிக கலாச்சாரம் என்று மக்களின் சிந்தனையில் பதித்தனர். வலுக்கட்டாயமாக குடும்பக் கட்டுப்பாடு திட்டத்தை செயல்படுத்தினர்.

குழந்தைகள் அமானிதம் என்பதையும் வளம் பெருக்கும் செல்வங்கள் என்பதையும் குடும்பப் பண்பாடாக கொண்டுள்ள முஸ்லிம்களுக்குள்ளும் இந்த மேற்கத்திய கலாச்சாரம் ஊடுருவிவிட்டது.

முதியோர்கள் சொத்துக்கள் குடும்பங்கள் வழிபாட்டுத் தளங்கள் இவை பாதுகாக்கப்பட வேண்டும் என்றல் உழைக்கின்ற திறனுடைய இளைஞர்கள் எண்ணிக்கை குறையாமலும் அவர்கள் வழிதவறி செல்லாமலும் பார்த்துக் கொள்ள வேண்டிய கடமை சமூகப் பொறுப்பாளர்களுக்கு இருக்கிறது.

அதிக குழந்தைகள் பெற்றுக் கொள்வதை ஆர்வப்படுத்தி குடும்பங்கள் துவங்கி ஜுமுஆ மேடைகள் வரை அனைத்து வகைகளிலும் விரிவான விழிப்புணர்வு பிரச்சாரங்கள் மேற்கொள்ளப்பட வேண்டிய நெருக்கடியான காலம் இது.

-CMN SALEEM

யா அல்லாஹ்…

சாதிமத வேறுபாடு காட்டாது ஒடுக்கப்பட்டவர்களுக்கும் அநீதி இழைக்கப்பட்டவர்களுக்கும் ஆதரவாக கடைசிவரை களத்தில் நின்று போராடிய இந்த போராளியின் பாவங்களை மன்னித்து அவரை அரவணைத்துக் கொள்வாயாக….

கருணைமிக்க ரஹ்மானே…

சுமார் முப்பதாண்டுகாலம் இந்த உம்மத்துக்கு சமூக அரசியல் அறிவூட்டி உம்மத்தின் கோழைத்தனத்தை அகற்றிட இறுதிமூச்சு வரை போராடிய இவரது மண்ணறையை விசாலமாக்கி ஒளிமயமாக்கி நறுமணம் கமழும் பூஞ்சோலையாக்கி வைப்பாயாக…