குடியரசு இந்தியாவின் துவக்க காலத்தில் வாழ்ந்த தமிழக முஸ்லிம்களுக்கு இஸ்லாமிய வரலாறுகள் பாடமாக பயிற்றுவிக்கப்பட்டிருந்தால் இந்நேரம் உம்மத்தில் மறுமலர்ச்சி ஏற்பட்டிருக்கும்.

இந்த நாட்டின் வளர்ச்சியை வழிநடத்துவோரில் முஸ்லிம்களே முதல்நிலை வகித்திருப்பார்கள்.

மிக முக்கியமாக, மார்க்கத்தின் பிரிவு விடயங்களில் உண்டாகும் கருத்து வேறுபாடுகளை தூக்கிப் பிடித்துக் கொண்டு காலம் தள்ளுவோர் கண்டுகொள்ளாமல் விடப்பட்டிருப்பார்கள்.

ஒரு சமூகத்தின் வரலாறும் பகுத்தறிவுமிக்க மரபுகளும் தான் அந்த சமூகம் கரையேறுவதற்கு காரணியாக இருக்கும் கலங்கரை விளக்கு.

அல்லாஹ்வின் கருணையால் கடந்த சில ஆண்டுகளாக உம்மத்தில் முதிர்ச்சியான அணுகுமுறை அதிகரித்து வருகிறது. அறிவு செல்வம் அந்தஸ்த்து போன்ற அமானிதங்களை பெற்றவர்களிடம் இருந்த அகங்கார இறுக்கம் தளர்ந்து வருகிறது.

நாட்டின் சமீபகால சமூக அரசியல் நெருக்கடிகள் இந்த மாற்றத்திற்கு முக்கிய காரணமாக இருக்கின்றன.

வணக்க வழிபாடுகளுடன், இஸ்லாமிய வரலாற்றுப் பின்புலத்தில் நவீனக் கல்வி ஆராய்ச்சி தொழில் செல்வம் பெருக்குதல் போன்றத் துறைகளில் கவனத்தை குவித்து தன்னையும் தனது குடும்பத்தையும் உம்மத்தையும் இந்த நாட்டையும் வறுமை ஏழ்மையிலிருந்து மீட்டு வளர்ச்சிப் பாதையில் கொண்டு செல்லும் ஆக்கப்பூர்வமான பணிகளில் உம்மத்தின் மாணவர்கள் இளைஞர்கள் தங்களை ஈடுபடுத்திக் கொள்கிற போது இந்த மாற்றங்களின் வேகம் அதிகரிக்கும்.

இதுவே ஒரு மூமின் மண்ணறையிலும் மறுமையிலும் வெற்றி பெற்று உயர்ந்த பரிசுகளை பெறுவதற்கான இஸ்லாமிய போட்டித்தேர்வுகள் (Islamic Competitive Exam).

நாடாளுமன்ற கூட்டுக்குழு இறுதி செய்துள்ள வக்ஃப் சட்ட திருத்த மசோதாவை உச்சநீதிமன்றத்தின் மூலமாக அல்லது ஆட்சி மாற்றத்தின் மூலமாக மட்டுமே அகற்ற முடியும். அப்படியே அகற்றினாலும் அதை வேறொரு வடிவத்தில் கொண்டுவரும் முயற்சிகள் தொடர்ந்து கொண்டே தான் இருக்கும்.

பள்ளிவாசல்கள் மதரஸாக்கள் வக்ஃப் சொத்துக்கள் இவற்றை இந்திய அறக்கட்டளைச் சட்டத்தின் (Religious and Charitable Trust) கீழ் பதிவு செய்து கொள்வது நிரந்தர பாதுகாப்பை (ஓரளவுக்கு) வழங்கும்.

ஆளுமைமிக்க சட்ட வல்லுனர்களின் தேவைகள் அதிகரித்து கொண்டே வருகிறது என்பதை கடந்த 25 ஆண்டுகளாக நாங்கள் கூறி வருவதை கவனத்தில் கொள்ளுங்கள்.

நாம் விரும்பினாலும் இல்லாவிட்டாலும் இனிவரும் ஆலிம்கள் ஜமாஅத் பொறுப்பாளர்கள் தேர்தல் அரசியலில் ஈடுபடும் இளைஞர்கள் உள்ளிட்டோர் கட்டாயம் சட்டம் படித்தவர்களாக இருக்க வேண்டிய நெருக்கடியை காலமும் சூழலும் உருவாக்கிக் கொண்டிருக்கிறது.

அது மட்டுமல்ல. சர்வதேச நீதிமன்றங்களிலும் ஆளுமைமிக்க வழக்கறிஞர்களாக அதிகாரம் பெற வேண்டிய நெருக்கடியும் அதிகரிப்பதை உணர்ந்து கொள்ள வேண்டும்.

-CMN SALEEM

பாஜக அரசு கொண்டுவந்துள்ள வஃக்பு சட்டத்திருத்த மசோதா – 2024 இல் திருத்தங்கள் செய்வதற்காக அமைக்கப்பட்ட நாடாளுமன்ற நிலைக்குழு எதிர்க்கட்சிகளின் பரிந்துரைகள் அனைத்தையும் நிராகரித்து விட்டது.விரைவில் கூடவுள்ள நாடாளுமன்ற கூட்டத்தில் இந்த மசோதா சமர்ப்பிக்கப்படும் என்று எதிர்பார்க்கப்படுகிறது.

நாடு முழுவதும் வெளிப்படையான விவாதப் பொருளாகவும், மறைமுகமாக நடைமுறைப் படுத்தப்பட்டும் வந்த பொது சிவில் சட்டம் முதன்முறையாக உத்தரகாண்ட் மாநிலத்தில் சட்டமாகியுள்ளது.

உணர்ச்சி வசப்படாமல் மக்களை உணர்ச்சி வசப்படுத்தாமல் தொலைநோக்குத் திட்டத்தையும் அர்ப்பணிப்புடன் கூடிய சேவையையும் யார் முன்னெடுத்தாலும் அது நிச்சயம் மாற்றங்களை ஏற்படுத்தும் என்பதற்கு இந்த இரண்டு விரும்பத்தகாத அடைவுகளும் மிகச்சிறந்த உதாரணங்கள்.

இந்த இரண்டு செய்திகளும் சமூக அக்கறையுடைய முஸ்லிம்களுக்கு ஒருவிதமான சங்கடத்தையும் நெருக்கடிகளையும் ஏற்படுத்தும் என்பதில் சந்தேகமில்லை.

எந்த சங்கடத்துக்கு நெருக்கடிகளுக்கும் உள்ளாக வேண்டியத் தேவையில்லை.

இதுபோன்ற அரசியல் மற்றும் சட்ட ரீதியான சிக்கல்களுக்கு நிலையான அறிவுப்பூர்வமான தீர்வுகளை ஆலோசித்து அதை நோக்கி நாம் நகர்வதும் உம்மத்தின் இளைஞர்களை நகர்த்துவதும் நமது இலக்காக மாறினால் வெகுவிரைவில் மிக அழகிய அமைதியான மாற்றங்களை ஏற்படுத்த முடியும்.

ஷரீஅத் மற்றும் சட்டக்கல்வி இந்த இரண்டு துறைகளிலும் கல்வியியல் புலமையுடையவர்களால் (Academic Excellence) மட்டும் தான் இந்த சிக்கல்களின் ஆழத்தையும் விசாலத்தையும் புரிந்து கொள்ளமுடியும்.

அப்படிப்பட்ட வல்லுனர்களின் நியாமான கோரிக்கைகள் வாதங்கள் ராஜ்ய ரீதியான லாபி மற்றும் சட்டப் போராட்டங்களால் மட்டும் தான் இதுபோன்ற நெருக்கடிகளை எதிர்கொள்ள முடியும்.மிக குறைவாக உள்ள நமது மக்கள் தொகை மற்றும் பொருளாதார வளங்களை பயன்படுத்தி நம்மை ஆற்றல்படுத்திக் கொள்ள முடியும்.அதன் மூலம் நிலையானத் தீர்வுகளையும் ஏற்படுத்த முடியும்.

பன்முகத் தன்மையுடைய ஜனநாயக நாட்டில் சட்ட சமூக நெருக்கடிகளை எதிர்கொள்ளும் வழிமுறை என்று நமது அடுத்த தலைமுறைக்கு கற்பிக்கவும் இதுதான் தகுதியுடைய பாடமாகவும் இருக்கும்.

ஒவ்வொரு மதரஸாவிலும் சமுதாய அமைப்பிலும் முஹல்லாவிலும் அதுபோன்ற வல்லுநர்களை உருவாக்குவதற்கு முஸ்லிம்களுக்கு எந்த தடையும் இல்லை

முஹல்லா மாணவர்களுக்கும் இளைஞர்களுக்கும் உயர்வான இலக்கை முன்னிறுத்தி தலைமைத்துவ பயிற்சிகள் அளிப்பதினூடாக எதிர்காலத்தில் கல்வி சமூக பொருளாதார அரசியல் தளங்களில் ஆகச்சிறந்த ஆளுமைகளை உருவாக்க முடியும்.

மனித இனத்தை வறுமையிலிருந்தும் போர்களிலிருந்தும் பாதுகாத்து பூமியில் அமைதியை நிலைபெறச்செய்யும் நுண்ணறிவுமிக்க அரசியல் ஞானிகளாக நீங்கள் உருவாக வேண்டும்.

மனிதர்களை நோய்களிலிருந்து பாதுகாத்திடும் எளிய மருந்துகளை கண்டறியும் ஆகச்சிறந்த உயிரியல் விஞ்ஞானிகளாக நீங்கள் உருவாக வேண்டும்.

உலகம் முழுவதும் அநீதம் இழைக்கப்படும் மக்களுக்கு நீதி நபியின் வழியில் ஆதரவாக சட்டப் போராட்டங்களை மேற்கொள்ளும் சர்வதேச வழக்கறிஞர்களாக நீங்கள் உருவாக வேண்டும்.

மகத்தான தொழில் சாம்ராஜ்யங்களை கட்டமைத்து பல்லாயிரம் பேருக்கு வேலை கொடுக்கும் பெரும் தொழிலதிபர்களாக நீங்கள் உருவாக வேண்டும்.

இது ஒவ்வொரு பள்ளிவாசல்களிலும் வாய்ப்பு கிடைக்கும் போதெல்லாம் மஹல்லா மாணவர்களுக்கும் இளைஞர்களுக்கும் தொடர்ச்சியாக பயிற்றுவிக்க வேண்டிய உயர்ந்த இலக்குடன் கூடிய தலைமைத்துவ பாடம். பசுமரத்தாணி போல ஆயுள் முழுவதும் அவர்களின் மனதில் ஆழமாக பதிவாகியிருக்கும்.

இரண்டு கல்வியிலும் தேர்ச்சியுடைய, ஒட்டுமொத்த உம்மத்தின் மீதும் அன்பு செலுத்தும், தஸவ்வுஃப் (அகச் சுத்திகரிப்பு) கலையில் ஆழமான பயிற்சிகளுடைய ஆலிம்கள் தான் இந்த தலைமைத்துவ பயிற்சிகளை அளிப்பதற்கு தகுதியுடைவர்கள்.

ஆலிம்களை உளமார கண்ணியப்படுத்தும் முஸ்லிம் சமூகம் உருவாக வேண்டும். அதற்கு இதுபோன்ற உயர்ந்த இலக்கை சமூகத்தின் இளைஞர்களுக்கு அர்ப்பணிப்புடன் பயிற்றுவிக்கும் இளம் ஆலிம்கள் உருவாக வேண்டும்.

இந்த இரண்டு முயற்சிகளும் ஈகோ இல்லாமல் இணைவதற்கு அல்லாஹ்வின் பரக்கத்துக்காக அனைவரும் பிரார்த்திக்க வேண்டும்.

-CMN SALEEM

முஸ்லிம்கள் தங்களது அகத்தையும் புறத்தையும் பொருளையும் தூய்மைப்படுத்திக் கொள்வதற்கு அல்லாஹ் ரப்புல் இஸ்ஸத் அருட்கொடையாக வழங்கியுள்ள ரமலான் மாதம் நெருங்கிக் கொண்டிருக்கிறது.

இரவுத்தொழுகை தொடர் பயான்கள் ஸஹர் உணவு இஃப்தார் ஏற்பாடுகள் என்று முஹல்லாவாசிகளை பள்ளிவாசல்களுடன் நெருக்கமாக்கி ஆன்மிகப் படுத்துவதில் பெரும் சிரத்தை எடுத்துக் கொள்ளும் ஜமாஅத் நிர்வாகம் பாரம்பரியமான நோன்புக்கஞ்சி காய்ச்சுவதில் இன்றைய மக்களின் உடல் நிலையை கொஞ்சம் கவனத்தில் கொள்ள வேண்டும் என்பது எங்களது வேண்டுகோள்.

இன்றைய மூமின்களின் வீடுகள் முழுவதும் மருந்து மாத்திரைகள் நிரம்பிக் கிடக்கின்றன. பெண்களிடம் தூக்க மாத்திரைகள் சர்வ சாதாரணமாக புழங்குகிறது. முஹல்லாக்களில் வளரும் பிள்ளைகளிடம் ஊட்டச்சத்து குறைபாடு காரணமாக உடல் வளர்ச்சியின்மை பார்வை கோளாறு கல்வி ஆர்வமின்மை ஆண்மை பெண்மை குறைபாடுகள் அதிகரித்துக் கொண்டிருக்கின்றன. இவையெல்லாவற்றையும் நாம் அனைவரும் அறிந்திருந்தும் கூட எதுவும் செய்ய இயலாத நிலையில் நிற்கிறோம்.

மனித இனத்திற்கு நோய்கள் ரீதியாக இது ஒரு பேரிடர் காலம்.இவை எல்லாவற்றுக்கும் நம்மால் தீர்வளிக்க முடியாது. ஆனால் ஜமாஅத் நிர்வாகம் மாற்றத்திற்கான விதையாக மாறி பெரும் மதீப்பீடுகளுடன் உயர்ந்து நிற்க முடியும்.

நோன்புக்கஞ்சிக்கு அரசு கொடுக்கும் பச்சரிசியுடன் கம்பு தினை வரகு குதிரைவாலி உள்ளிட்ட ஏதாவது ஒரு சிறுதானிய உடசலையும் சேர்த்துக் கொண்டால் நோன்புக்கஞ்சி ருசியான ஊட்டச்சத்து மிகுந்ததாக தரம் உயர்ந்துவிடும்.

வருகின்ற ரமலான் மாதத்தில் ஜமாஅத் நிர்வாகம் இந்த ஒரு சிறிய முயற்சியை எடுத்தால், இதனால் முஹல்லா மக்களுக்கு மாணவ மாணவிகளுக்கு தமிழகத்தின் மானாவாரி விவசாயிகளுக்கு தமிழக பொருளாதாரத்திற்கு என்று பலனடைவோர் எண்ணிக்கை நீண்டுகொண்டே போகும்.

மரியாதைக்குரிய ஜமாஅத் நிர்வாகம் ஆலிம்கள் புரவலர்கள் சமுதாய அமைப்புகளின் தோழர்கள் சமூக ஆர்வலர்கள்…..

உங்கள் பிள்ளைகளின் நலனுக்காக சந்ததிகளின் நலனுக்காக உங்கள் முஹல்லா பள்ளியில் இந்த ஆண்டு முதல் நோன்புக்கஞ்சிக்கு பச்சரிசியுடன் கொஞ்சம் சிறுதானியங்களையும் சேர்த்துக் கொள்ளுங்கள்.

வெளிநாடுகளில் இயங்கும் ஜமாஅத்கள் தங்கள் ஊரில் இந்த மாற்றத்தை ஏற்படுத்திட நிர்வாகத்துக்கு பொருளாதார உதவிகள் செய்திட வேண்டும்.

உம்மத்தின் அறிவு உள்ளம் உடல் வாழ்ச்சூழல் இவற்றை மேம்படுத்தாமல் நவீன கல்வி மேம்பாடு சாத்தியமில்லை என்பதால் மாற்றத்திற்கான ஒரு சிறிய கவன ஈர்ப்பாக சிறுதானிய நோன்புக்கஞ்சி குறித்து பல ஆண்டுகளாக விழிப்புணர்வு ஏற்படுத்தி வருகிறோம்.

-CMN SALEEM

பிள்ளைகள் மக்தப் மதரஸாவில் அல்குர்ஆனை ஓதி முதன்முதலாக நிறைவுசெய்த ஆனந்தத்தை பாச்சோறு பகிர்ந்து கொண்டாடும் கடற்கரைப் பகுதி முஸ்லிம்களின் பண்பாட்டு அடையாளம்.

கொண்டாட்ட வழிமுறைகள் ஊருக்கு ஊர் வேறுபட்டாலும் 90 களில் வாழ்ந்த முஸ்லிம்களின் வாழ்வில் ஒன்றுகலந்திருந்த உயர்ந்த நாகரிகம் இது.

முதன்முதலில் எஸ்ஸர்னல் குர்ஆன் ஓத துவங்கும் அன்று பெண் பிள்ளைகளுக்கு புத்தாடை உடுத்தி நகைகள் அணிவித்து அலங்கரித்து பள்ளிக்கு அனுப்புவார்கள்.

அதிகாலை நேரத்தில் அரைதூக்கத்துடன் மக்தப் மதரஸாவிற்கு பல மாதங்கள் நடந்து ஆலிம்ஸா முன்பாக பக்தியுடனும் அச்சத்துடனும் அமர்ந்து முழு குர்ஆனையும் ஓதிமுடிக்கும் தங்களது பிள்ளைகளை கண்டு அடையும் ஆனந்தத்தை அளவிட்டுவிட முடியாது.

அன்றைய தினம் அல்லாஹ்வுடன் மிக நெருக்கமாகி விட்டதாகவே உணருவார்கள்.ஒரு பெரும் மார்க்கக் கடமையை நிறைவேற்றிவிட்ட பெருமிதமும் மனநிறைவும் பெற்றோர்களுக்கு ஏற்படுகிறது.அதை பல்வேறு வடிவங்களில் வெளிப்படுத்துவார்கள்.

பள்ளிவாசலே கதி என்று கிடந்து அல்குர்ஆனை அற ஒழுங்குடன் ஓதிக்கொடுத்த ஆலிம்ஸாவை வீட்டுக்கு அழைத்து புத்தம்புது வெள்ளை கைலி மார்ட்டின் சட்டையுடன் வசதிக்கேற்ப கையில் கொஞ்சம் பணமும் கொடுத்து கண்ணியப்படுத்திய கள்ளம் கபடமில்லாத உள்ளங்கள் வாழ்ந்த காலம் அது.

தங்கள் பிள்ளைகள் ஓதிமுடித்த மகிழ்ச்சியான செய்தியை ஊருக்கும் உறவுகளுக்கும் வெளிப்படுத்தும் விதமாக அவிக்காத நெல்லை அரவை மில்லுக்கு அனுப்பி உமி நீக்கி கொண்டவரப்பட்ட வெள்ளை வெளீரென்ற பச்சரிசியுடன் தேங்காய்ப்பால் நாட்டுவெல்லம் ஏலக்காய் கடலைப்பருப்பு முந்திரி சேர்த்த பாச்சோற்றில் பசுநெய் ஊத்தி ஊரே மனக்க அந்த தாய் தந்தையின் உள்ளமும் மனக்க மகிழ உறவுகளுக்கெல்லாம் பகிர்வார்கள்.

ஊரும் உறவுகளும் கூடி அந்த பிள்ளைக்காகவும் ஓதிக்கொடுத்த ஆலிம்ஸாவுக்காகவும் துஆ செய்வார்கள். இந்த அழகிய பண்பாடு இன்று அருகிப் போய்விட்டது. இன்றைய தலைமுறை இழந்துவிட்ட பல மகிழ்ச்சிகரமான பண்பாட்டு கொண்டாட்டங்களில் இதுவும் ஓன்று.

அல்குர்ஆனை ஓதிமுடிக்கும் பிள்ளைகளை கொண்டாடும் அந்த அழகிய மரபை மீளுருவாக்கம் செய்ய வேண்டும்.அல்லாஹ்வுக்கு நாம் செய்யும் இபாதத்துகளை வரம்புக்குட்பட்டு கொண்டாடி கொள்வதும் ஒரு பிரிவு இபாதத் தானே.

அதேபோல ஊர் பிள்ளைகள் அனைவருக்கும் குர்ஆன் ஓதிகொடுப்பதிலேயே வாழ்வை அர்ப்பணித்த மூத்த ஆலிம்களை கண்டால் அவர்களை கண்ணியப்படுத்துவதும் அவர்களது குடும்பத்தை கண்ணியப்படுத்துவதும் உயர்ந்த பண்பாடு தானே.அதுவும் ஒரு பிரிவு இபாதத் தானே.

பலநூறு பிள்ளைகளின் நாவிலும் உள்ளத்திலும் அல்குர்ஆனை பதிவாக்கிய அந்த ஒரு இறைச்சேவைக்காக வழங்கப்படும் ஈடுஇணையற்ற நன்மைகள் மலைபோல உயர்ந்து நின்று அந்த ஆலிம்ஸாக்களுக்காக மண்ணறையிலும் மறுமையிலும் அல்லாஹ்விடம் சாட்சி கூறும் என்பதில் என்ன சந்தேகம் இருக்கப் போகிறது.

ஊர் கூடிய உறவுகள் கூடிய கொண்டாட்டங்கள் இல்லாத மூ،ஃமின்களிடம் மனஇறுக்கமும் வெறுமையும் பிளவுகளும் அதிகரிக்கும்.

—————————-

எனது தம்பி மகள் குர்ஆன் ஓதி முடித்த கொண்டாட்டம். துஆ செய்யுங்கள்.