சட்டம் என்பது வெறும் புத்தகங்களுக்குள் அடங்கிய பாடம் அல்ல; அது உரிமைகளைப் பாதுகாக்கும் கருவி, சமூக மாற்றத்திற்கான ஆயுதம், நீதி நிலைநாட்டுவதற்கான வலிமை. அந்த வகையில், சட்டத் துறையில் பயிலும் மாணவர்களுக்கு கல்வியைத் தாண்டிய பரந்த வாய்ப்புகளையும் சமூகப் பொறுப்பையும் அறிமுகப்படுத்தும் நோக்கில், தமிழ்நாடு முஸ்லிம் கல்வி இயக்கம் சார்பில் சட்டக்கல்லூரி மாணவ, மாணவிகளுக்கான ஒருநாள் பயிலரங்கம் சென்னையில் நடைபெற்றது.

செப்டம்பர் 5, சனிக்கிழமை, சென்னை பிராட்வே சாலையில் அமைந்துள்ள ஹயாத் மஹாலில் நடைபெற்ற இப்பயிலரங்கம், சட்ட மாணவர்களின் எதிர்காலத்தைப் பல்வேறு கோணங்களில் சிந்திக்க வைத்ததுடன், அவர்களுக்குள் புதிய நம்பிக்கையையும் இலக்கையும் உருவாக்கும் வகையில் அமைந்தது. அல்ஹம்துலில்லாஹ்.

ஒரு சட்ட மாணவர் தனது கல்வித் திறனுடன் நின்றுவிடாமல், தன்னை அனைத்து நிலைகளிலும் ஆற்றல்படுத்திக் கொள்ள வேண்டும்; சட்டத் துறையில் தேசிய அளவிலான வாய்ப்புகளுடன் சர்வதேச அளவில் வளர்ந்து வரும் வாய்ப்புகளையும் அடையாளம் கண்டு பயன்படுத்திக் கொள்ள வேண்டும் என்பதே இப்பயிலரங்கத்தின் அடிப்படை நோக்கமாக இருந்தது.

அதிலும் முக்கியமாக, சமூகத்தின் உரிமைகளை சட்டரீதியாகப் பாதுகாக்கவும், உம்மத்தை சட்டரீதியாக அதிகாரப்படுத்தவும் தேவையான அறிவும் திறனும் கொண்ட புதிய தலைமுறை சட்ட மாணவர்களை உருவாக்குவதற்கான பயணத்தில், இந்தப் பயிலரங்கம் ஒரு முக்கியமான மைல்கல்லாக அமைந்தது.

சட்டக் கல்வி தரும் வலிமை

பயிலரங்கத்தின் முதல் அமர்வு, “சட்டம் ஏன் முக்கியம்?” என்ற அடிப்படைக் கேள்விக்கு விடை தேடும் வகையில் அமைந்தது. சட்டக் கல்வியின் முக்கியத்துவம் மற்றும் அதன் மூலம் கிடைக்கக்கூடிய அதிகாரம் குறித்து மக்கள் வழக்கறிஞர் பவானி ப. மோகன் மற்றும் ஓய்வுபெற்ற மாவட்ட உரிமையியல் நீதிபதி ஏ. முஹம்மது ஜியாப்தீன் ஆகியோர் உரையாற்றினர்.

தங்களது நீண்டகால அனுபவங்களின் அடிப்படையில் சட்டத் துறையின் நடைமுறைச் சூழல்களை மாணவர்களுக்கு எடுத்துரைத்த அவர்கள், சட்டம் கற்பது என்பது ஒரு பட்டம் பெறுவதற்கான முயற்சி மட்டுமல்ல; அது தனிமனிதனுக்கும் சமூகத்திற்கும் வலிமை சேர்க்கும் ஒரு வாய்ப்பு என்பதை விளக்கினர்.

வழக்கறிஞர் பணியைத் தாண்டி…

சட்டம் படித்தால் வழக்கறிஞராக மட்டுமே ஆக வேண்டும் என்ற எண்ணத்தைத் தாண்டி, சட்டத் துறையில் இருக்கும் பல்வேறு வாய்ப்புகளை மாணவர்களுக்கு அறிமுகப்படுத்தியது இரண்டாவது அமர்வு.

நீதித்துறை சேவைகள் தேர்வு, வழக்கறிஞர் பணி, சட்டக் கல்வியின் பல்வேறு பிரிவுகள் உள்ளிட்ட பல்வேறு வாய்ப்புகள் குறித்து சென்னை உயர் நீதிமன்ற மூத்த வழக்கறிஞர் எம். அரவிந்த் சுப்ரமணியம், ரேடியண்ட் ஐஏஎஸ் அகாடமியின் நிறுவனர் ஆர். ரஹ்மதுல்லாஹ் மற்றும் கிரசெண்ட் சட்டக் கல்லூரியின் உதவிப் பேராசிரியர் டி. அருண்குமார் ஆகியோர் மாணவர்களுடன் கலந்துரையாடினர்.

தேர்வுக்கான தயாரிப்பு முதல் தொழில்முறை வாழ்க்கையைத் திட்டமிடுவது வரை மாணவர்களின் பல்வேறு சந்தேகங்களுக்கு அவர்கள் வழிகாட்டுதல்களை வழங்கினர். இதன் மூலம், சட்டக் கல்விக்குப் பிறகு தங்களுக்காகக் காத்திருக்கும் பாதைகள் குறித்து மாணவர்கள் தெளிவான புரிதலைப் பெறும் வாய்ப்பு கிடைத்தது.

சட்டத்தின் வழியே சமூக நீதி

பயிலரங்கத்தின் மூன்றாவது அமர்வு, சட்டத்திற்கும் சமூக நீதிக்கும் இடையிலான உறவை மையப்படுத்தியது.

“சமூக நீதிக்கான சட்டப் போராட்டங்கள்” என்ற தலைப்பில் நாடாளுமன்ற உறுப்பினரும் திமுகவின் மாநில பொதுச் செயலாளருமான வழக்கறிஞர் ஆ. ராசா சிறப்புரையாற்றினார். தமிழகத்தின் சமூக நீதி வரலாற்றை விரிவாக எடுத்துரைத்த அவர், சமூக மாற்றத்தை உருவாக்குவதில் சட்டத்தின் பங்கு குறித்து மாணவர்களிடம் பேசினார்.

சமூகத்தில் நிலவும் ஏற்றத்தாழ்வுகளை எதிர்கொள்வதற்கும், ஒடுக்கப்பட்ட மக்களின் உரிமைகளைப் பாதுகாப்பதற்கும் சட்டம் எவ்வாறு பயன்படுத்தப்படலாம் என்பதை விளக்கிய அவரது உரை, சட்ட மாணவர்களுக்கு புதிய சிந்தனையை ஏற்படுத்தும் வகையில் அமைந்தது.

சட்டம் என்பது நீதிமன்றங்களில் வழக்காடுவதற்கான கருவி மட்டுமல்ல; சமூக நீதியை நிலைநாட்டுவதற்கும் மக்களின் உரிமைகளை உறுதி செய்வதற்குமான வலிமையான கருவி என்பதையும் இந்த அமர்வு உணர்த்தியது.

உலகை நோக்கி விரியும் கல்வி வாய்ப்புகள்

நான்காவது அமர்வு மாணவர்களின் பார்வையை இந்திய எல்லைகளைக் கடந்து உலகை நோக்கித் திருப்பியது.

“வெளிநாடுகளில் மேற்படிப்பு மற்றும் ஆராய்ச்சிக் கல்விக்கான நிதியுதவிகள்” என்ற தலைப்பில் தமிழ்நாடு முஸ்லிம் கல்வி இயக்கத்தின் உயர்கல்வி ஆலோசகர் வழக்கறிஞர் எம். முஹம்மது இஸ்மாயில் மற்றும் ஜாமிஅத்துல் ஹிக்மா அரபிக் கல்லூரியின் பேராசிரியர் வழக்கறிஞர் தௌஃபீக் அல்புகாரி ஆகியோர் மாணவர்களுக்கு வழிகாட்டுதல்களை வழங்கினர்.

வெளிநாடுகளில் உயர்கல்வி மற்றும் ஆராய்ச்சியைத் தொடர்வதற்கான வாய்ப்புகள், அதற்குக் கிடைக்கக்கூடிய நிதியுதவிகள் உள்ளிட்ட பல்வேறு அம்சங்கள் குறித்து அவர்கள் விளக்கினர். இதன் மூலம், “வெளிநாட்டில் படிப்பது என்பது வசதி படைத்தவர்களுக்கு மட்டுமே சாத்தியம்” என்ற எண்ணத்தைத் தாண்டி, திட்டமிடலும் சரியான வழிகாட்டுதலும் இருந்தால் சர்வதேச கல்வி வாய்ப்புகளை எவ்வாறு அணுகலாம் என்பதற்கான புரிதல் மாணவர்களுக்கு கிடைத்தது.

சர்வதேச சட்டம் – புதிய வாசல்

பயிலரங்கத்தின் ஐந்தாவது அமர்வு, மாணவர்களுக்கு சர்வதேச சட்டத்தின் கதவைத் திறந்து வைத்தது.

“சர்வதேச சட்டம் – ஓர் அறிமுகம்” என்ற தலைப்பில், பிரிட்டனில் உள்ள புகழ்பெற்ற பிரிஸ்டல் கல்லூரியில் சட்டப் படிப்பை முடித்து, தற்போது சென்னை உயர் நீதிமன்ற வழக்கறிஞராக உள்ள மௌலவி எஸ். முஹம்மது சாஜித் அல் புகாரி நத்வி மாணவர்களுக்கு வழிகாட்டினார்.

சர்வதேச சட்டத்தின் அடிப்படைகள், அதன் முக்கியத்துவம் மற்றும் இந்தத் துறையில் உருவாகி வரும் வாய்ப்புகள் குறித்து அவர் எடுத்துரைத்தார். இந்தியாவைத் தாண்டி உலகளாவிய சட்டத் துறையில் பயணிக்க விரும்பும் மாணவர்களுக்கு இந்த அமர்வு புதிய பாதைகளை அறிமுகப்படுத்தியது.

பிரிட்டனை நோக்கிப் புறப்படும் ஒரு மாணவர்

இந்தப் பயிலரங்கம் வெறும் வழிகாட்டுதலுடன் முடிந்துவிடவில்லை. அந்த வழிகாட்டுதல்களை நடைமுறைப்படுத்துவதற்கான ஓர் அழகான நிகழ்வுக்கும் அது சாட்சியாக அமைந்தது.

தமிழ்நாடு முஸ்லிம் கல்வி இயக்கம் சார்பில் ஆண்டுதோறும் சர்வதேச அளவில் உயர்கல்வி பயில்வதற்காக மாணவர்கள் ஐரோப்பிய நாடுகளுக்கு அனுப்பப்பட்டு வருகின்றனர். அந்தத் தொடர்ச்சியில், பிரிட்டனில் சட்டக் கல்வி பயிலச் செல்லும் மாணவர் வழக்கறிஞர் ரோஷன் அக்தருக்கு வழியனுப்பும் நிகழ்வும் நடைபெற்றது.

ஒருபுறம் மாணவர்களுக்கு சர்வதேச கல்வி வாய்ப்புகள் குறித்து வழிகாட்டப்பட்டுக் கொண்டிருக்க, மறுபுறம் அதே வாய்ப்பைப் பயன்படுத்தி பிரிட்டனில் சட்டக் கல்வி பயிலச் செல்லும் மாணவருக்கு வழியனுப்பு வழங்கப்பட்டது. இதனால், பயிலரங்கில் பேசப்பட்ட சர்வதேச கல்வி வாய்ப்புகள் மாணவர்களுக்கு ஒரு நடைமுறை உதாரணமாகவும் அமைந்தது.

இலக்குடன் நிறைவடைந்த நாள்

இறுதி அமர்வில், தமிழ்நாடு முஸ்லிம் கல்வி இயக்கத்தின் நிறுவனர் CMN சலீம் சிறப்புரையாற்றினார். மாணவர்களின் எதிர்கால வாழ்க்கை சிறக்க வேண்டிய வழிமுறைகள் குறித்து ஊக்கமளிக்கும் வகையில் அவர் உரையாற்றினார்.

பயிலரங்கில் கலந்துகொண்ட மாணவர்களுக்கு சான்றிதழ்களையும் அவர் வழங்கினார்.

தமிழ்நாட்டின் பல்வேறு பகுதிகளில் இருந்தும் சட்டக்கல்லூரி மாணவர்கள் மற்றும் இளம் வழக்கறிஞர்கள் பரவலாகக் கலந்துகொண்ட இந்தப் பயிலரங்கம், ஒரு நாள் நிகழ்வாக இருந்தாலும் பல்வேறு தளங்களில் மாணவர்களின் சிந்தனைக்குப் புதிய பரிமாணத்தை வழங்கியது.

சட்டக் கல்வியின் முக்கியத்துவம் முதல் நீதித்துறை மற்றும் வழக்கறிஞர் பணி வரை; சமூக நீதிக்கான சட்டப் போராட்டங்கள் முதல் வெளிநாட்டு உயர்கல்வி மற்றும் ஆராய்ச்சி வாய்ப்புகள் வரை; அங்கிருந்து சர்வதேச சட்டம் வரை — சட்டத் துறையின் பல்வேறு பரிமாணங்களை ஒரே தளத்தில் மாணவர்களுக்கு அறிமுகப்படுத்தியது இந்தப் பயிலரங்கம்.

சட்டம் கற்பது ஒரு தொழிலைத் தேர்ந்தெடுப்பதற்காக மட்டுமல்ல; உரிமைகளை அறிந்து, நீதியை நிலைநாட்டி, சமூகத்தை வலுப்படுத்துவதற்காகவும் இருக்க வேண்டும் என்ற எண்ணத்தை மாணவர்களின் மனதில் விதைத்தபடி, இந்த ஒருநாள் பயிலரங்கம் நிறைவடைந்தது.

முஹல்லா தெருக்களிலிருந்து உலகின் ஆகச்சிறந்த ஆராய்ச்சியாளர்களையும் சர்வதேச சட்ட வல்லுநர்களையும் உருவாக்கும் வழிமுறைகள் குறித்த பயிலரங்கம் இடைவிடாமல் நடைபெற்று வருகிறது.

மதுரை விளாச்சேரியில் ” நெருக்கடியான காலத்தில் அடுத்த தலைமுறையை உருவாக்கும் வழிமுறைகள் ” குறித்து கல்வியாளர்கள் ஒருங்கிணைப்பு கருத்தரங்கம் நடைபெற்றது.

முஹல்லா மக்களை அதிகாரப்படுத்துவதில் தொலைநோக்கு இலக்குடன் இயங்கும் விளாச்சேரி நூருல் ஹுதா அறக்கட்டளையின் பொறுப்பாளர்கள் இந்நிகழ்வை மிகச்சிறப்பாக ஏற்பாடு செய்திருந்தனர்.

அம்மாபட்டினம் அன்னை கதீஜா கலை அறிவியல் மகளிர் கல்லூரியின் வணிகவியல் துறை சார்பில் ” மகளிர் தொழில்முனைவு மற்றும் அதிகாரமளித்தல் ” {STATE LEVEL CONFERENCE ON WOMEN ENTREPRENEURSHIP AND EMPOWERMENT} என்றது தலைப்பில் மாநில அளவிலான ஒரு நாள் கருத்தரங்கம் நடைபெற்றது.

தொழில் செய்யும் ஆர்வமுள்ள மகளிருக்கு அனைத்து துறைகளிலும் அதிகரித்து வரும் வாய்ப்புகளை நிபுணத்துவம் மிக்க 4 வல்லுநர்கள் மிகத் துல்லியமாக கவனப்படுத்தினர்.

அரசு கலை அறிவியல் கல்லூரி – பேராவூரணி

வெங்கடேஸ்வரா கல்லூரி – பேராவூரணி

காதர் முஹைதீன் கல்லூரி – அதிராம்பட்டினம்

அரசு கலை அறிவியல் கல்லூரி – அறந்தாங்கி

உள்ளிட்ட பல்வேறு கல்லூரிகளிலிருந்து இளநிலை முதுநிலை பயிலும் சுமார் 80 மாணவிகள் கலந்து கொண்டு ஆய்வறிக்கை சமர்ப்பித்தனர்.

பெண்களிடம் உழைப்பையும் பொருளீட்டலையும் வலியுறுத்தி அவர்களை அதிகாரப்படுத்தும் கருதரங்கமாக இது அமைந்திருந்தது.

ஷரீஅத்தை முறைப்படி கற்ற ஆலிம்களை சட்ட வல்லுனர்களாகவும் இந்திய ஆட்சிப்பணிக்கும் இடைவெளியின்றி உருவாக்க வேண்டும் என்ற உயார்வான இலக்குடன் தமிழ்நாடு முஸ்லிம் கல்வி இயக்கம் புதுச்சேரி மாநிலம் கடுவனூரில் கட்டமைத்து வரும் பைத்துல் ஹிக்மா கல்வி வளாகத்தின் முதல் நிறுவனமான ஜாமிஅத்துல் ஹிக்மா அரபிக் கல்லூரியின் முதலாவது பட்டமளிப்பு விழா பிப்.1 அன்று நடைபெற்றது.

தமிழ்மாநில ஜமாஅத்துல் உலமாவின் ஆளுமை மிக்கத் தலைவர் மௌலானா P.A.காஜா மொயீனுத்தீன் பாக்கவி அவர்களும் மேனாள் மாவட்ட நீதிபதி அ.முஹம்மது ஜியாவுதீன் அவர்களும் சிறப்பு விருந்தினர்களாக கலந்து கொண்டனர்.

அல்லாஹ்வின் கருணையால்….தமிழ்நாடு முஸ்லிம் கல்வி இயக்கம் தொடர்ச்சியாக முன்வைத்து வரும் உயர்கல்வி இலக்கின் அடையாளங்கள் உருவாகி வரத் துவங்கிவிட்டது.

அல்ஹம்துலில்லாஹ்….

ஆலிம் + அட்வகேட் / ஆலிம் + IAS உள்ளிட்ட அதிகாரமிக்க இலக்கை நோக்கி தங்களின் உயர்கல்விப் பயணத்தை தொடரும் இந்த இளம் உலமாக்களுக்காக துஆ செய்யுங்கள்.

அறிவு பொருள் நேரம் உள்ளிட்ட அமானிதங்களில் பெரும்பாலானவற்றை உம்மத்துக்காக அர்ப்பணித்து வாழ்ந்த அல்லது வாழும் ஒருசில மூஃமின்களால் அவர்கள் பிறந்த ஊர் உயர்ந்த மதிப்பீடுகளைப் பெற்று வரலாற்றில் இடம்பெறுகிறது.

அப்படிப்பட்ட ஒருசிலரின் உயர்ந்த வாழ்க்கை முறை காரணமாக அந்த ஊரும், ஊர் மக்கள் அனைவரும்,அவர்களது சந்ததியினரும்,மிகுந்த கண்ணியத்தைப் பெறுகின்றனர்.

தமிழகத்தில் பல முஸ்லிம் ஊர்களை அப்படி குறிப்பிட்டுச் சொல்லலாம்.அதில் ஒரு மகத்துவமான ஊர்தான் திண்டுக்கல் மாவட்டத்திலுள்ள கீரனூர்.

கீரனூரில் சமூகப் பொறுப்புள்ள பெருமக்களால் துவங்கப்பட்டுள்ள Wisdom Public School முதலாவது ஆண்டு விழா நிகழ்வில் சிறப்பு விருந்தினராக கலந்து கொண்டேன்.

நவீனகால முஸ்லிம் உம்மத்தின் கல்வித் தேவையை தெளிவாக தீர்க்கமாக அறிந்தவர்களால் துவங்கப்பட்டுள்ள தரமான CBSE பள்ளிக்கூடம். பழனி சுற்றுவட்டார மக்கள் அனைவரும் இந்த பள்ளிக்கூடத்தை மிகச்சரியாக பயன்படுத்திக் கொள்ள வேண்டும்.

—————

கீரனூர் பள்ளிவாசலில் தொழுதுவிட்டு அந்த பள்ளியை கட்டுவதற்கு முன்னின்று உழைத்த அனைவருக்காகவும் துஆ செய்தேன். பள்ளியின் பாரம்பர்ய வடிவமைப்பு நமது முன்னோர்களது அறிவுக்கும் அர்ப்பணிப்புக்கும் ஒரு சான்று. பள்ளி குறித்து தனியாக பதிவிடுகிறேன்.

உயர்கல்வி மற்றும் ஆராய்ச்சியில் முஸ்லிம்களுக்கு மிகச்சரியான இலக்கு நிர்ணயிக்க வேண்டும் என்ற தொலைநோக்குப் பார்வையுடன் மாநாட்டுக்கான ஏற்பாடுகள் நடைபெற்று வருகின்றன.

பெற்றோர்களே….

பள்ளி கல்லூரிகளில் படித்துக் கொண்டிருக்கும் உங்கள் பிள்ளைகளுடன் இந்த உயர்கல்வி மாநாட்டில் கலந்து கொள்ளாத் தயாராகுங்கள்.

உயர் அதிகாரத்தையும் நவீனகால பொருளாதாரத்தையும் ஒருசேர அடையும் வழிமுறையை இந்த மாநாடு உங்கள் பிள்ளைகளுக்கு பயிற்றுவிக்கும்.

ஏப்ரல் 17. கோவையில் உயர்கல்வி மாநாடு.

ஈரோடு மாவட்ட முஸ்லிம் அசோசியேசன் சார்பில் மீலாது விழா மற்றும் சிந்தனையாளர் பழ.கருப்பையா அவர்கள் எழுதிய “அல்லா வடிவமைத்த அழகிய சமூகம்” என்ற நூல் வெளியீட்டு விழாவும் சிறப்பாக நடைபெ‌ற்றது.

ஈரோடு மக்கள் சிந்தனைப் பேரவையின் தலைவர் த.ஸ்டாலின் குணசேகரன் அவர்களுடன் நானும் சிறப்பு அழைப்பாளர்களாக கலந்து கொண்டோம்.

ஈரோட்டின் உலமாக்கள் சமுதாயப் புரவலர்கள் சமுதாய அமைப்புகளின் பொறுப்பாளர்கள் உள்ளிட்ட ஏராளமானோர் இந்நிகழ்வில் கலந்து கொண்டு அண்ணன் பழ.கருப்பையா அவர்களின் முயற்சியை கண்ணியப்படுத்தினர்.

பெருமானார் (ஸல்) அவர்கள் குறித்தும் இஸ்லாமிய நாகரிகம் குறித்தும் முஸ்லிம் அல்லாத அறிஞர்களின் ஆக்கங்கள் பேச்சுக்கள் வெளிவந்து கொண்டே இருக்க வேண்டும். அதை ஊக்குவிக்கும் விதமாக இந்த விழா சிறப்பாக ஏற்பாடு செய்யப்பட்டிருந்தது.

இஸ்லாம் குறித்தும் முஸ்லிம்களின் வாழ்வியல் குறித்தும் எழுதப்படும் ஆய்வு நூல்களின் வழியாகத் தான் பிற சமுதாய அறிஞர்களிடம் அரசியல் தலைவர்களிடம் அரசு அதிகாரிகளிடம் ஒரு நல்ல புரிதலை ஏற்படுத்த முடியும்.

இலக்கிய விழாக்கள் குறைந்தால் எதிர்ப்பும் வெறுப்பும் மக்களிடம் அதிகரிக்கும். வாசிப்பு குறைந்த போனால் மக்களிடம் அடிமைத்தனம் அதிகரிக்கும்.