இன்றைய முஸ்லிம் சமூகத்தி்ன் பொருளாதார வளர்ச்சிக்கு இஸ்லாமிய நிதியியல் (Islamic Finance) படிப்பும் அதில் ஆராய்ச்சியும் மிகவும் அவசியமாக இருக்கிறது. இந்த படிப்பு தமிழக பல்கலைக்கழகங்களில் இல்லை.

அரபுநாடுகள் மலேசியா இந்தோனேசியா அமெரிக்க ஐரோப்பிய நாடுகளில் ஏராளமானவர்கள் இஸ்லாமிய நிதியியல் துறையில் பட்டம் பெற்று ஆராய்ச்சிப் படிப்பை முன்னெடுத்து வருகின்றனர்.

இந்திய மற்றும் பன்னாட்டு நிறுவனங்களுக்கு ஹலால் முதலீடுகள் மற்றும் பங்கு வர்த்தகம் குறித்த ஆலோசனைகளை அவர்கள் தான் வழங்குகின்றனர்.

இந்திய பங்குச்சந்தையில் பட்டியலிடப்பட்டுள்ள 54 % நிறுவனங்கள் ஹலால் பங்குகளை வழங்குகின்றன.

ஹலால் பங்குகளில் உள்நாட்டு வெளிநாட்டு முஸ்லிம்களின் முதலீடுகள் அதிகரிக்கிறது என்பதாற்காக பல இந்திய நிறுவனங்கள் தங்களது தொழில் முறைகளை ஷரிஆ ஆலோசனை வட்டத்துக்குள் கொண்டு வந்துள்ளன.

தமிழ்நாடு முஸ்லிம் கல்வி இயக்கம் ஏற்பாடு செய்துள்ள இந்த ஒருநாள் பயிலரங்கம் இஸ்லாமிய நிதியியல் மற்றும் இந்திய சவூதி ஹலால் பங்குச்சந்தை குறித்த அடிப்படையான புரிதலை வழங்கும்.

முன்பதிவு செய்வதற்கு நாளை கடைசிநாள்.

முன்பதிவுக்கு : 97892 34073

உலகக்கோப்பை கால்பந்தாட்ட போட்டி 2034 இல் சவூதி அரேபியாவில் நடைபெற உள்ளது.இந்த வாய்ப்பை பெருமைமிக்கதாக கருதும் சவூதி அரசாங்கம் 21 ஆம் நூற்றாண்டின் மிகப்பெரிய நிகழ்வாக இதை நடத்திக் காட்ட வேண்டும் என்ற சூளுரையுடன் ஏற்பாடுகளை துவங்கியுள்ளனர்.

அடுத்த பத்தாவது ஆண்டில் நடைபெற உள்ள இந்த உலகத் திருவிழாவுக்கான கட்டமைப்புப்பணிகள் நடைபெற்று வருகின்றன.

ஏற்கனவே உள்ள 15 கால்பந்தாட்ட மைதானங்களின் புனரமைப்புப் பணிகள் துவங்கப்பட்டு புதிதாக 11 உலகத்தரமான மைதானங்களும் கட்டப்படவுள்ளன.

ரியாத், ஜித்தா,அபஹா,கோபர், நியோம் ஆகிய நகரங்களில் 48 நாடுகள் பங்கேற்கும் 104 போட்டிகள் நடைபெற உள்ளன.

2022 இல் கத்தார் நாடு சுமார் ரூ.20 இலட்சம் கோடி செலவிட்டதாக தகவல்கள் கூறுகின்றன.நிச்சயமாக அதைவிட கூடுதலாகத் தான் சவூதி அரசாங்கம் செலவு செய்யும்.

கட்டுமானம்,பொறியாளர்கள்,வடிவமைப்பாளர்கள், தகவல் தொழில்நுட்பம், ரியல் எஸ்டேட், தனியார் தங்குமிடங்கள்,கஃபே, உணவகம்,போக்குவரத்து, பாலைவன பயணங்கள் உள்ளிட்ட எண்ணற்ற துறைகளில் ஏராளமான தொழில் வாய்ப்புகள் உருவாகி வருகின்றன.

குறிப்பாக MSME என்ற சிறு குறு நடுத்தர வகை தொழில்களில் கணிக்க இயலாத வாய்ப்புகள் உருவாகியுள்ளன.

இந்த சந்தர்ப்பத்தை திறமையானவர்கள் துணிச்சலாக முடிவெடுப்பவர்கள் தளராத உழைப்பாளிகள் தொழில் சாம்ராஜ்யங்களை கட்டமைக்கும் வேட்கையுடையவர்கள் மிகச்சரியாக பயன்படுத்திக் கொள்வார்கள்.

அதேநேரம் எந்தெந்த துறைகளில் நமக்கான தொழில் முதலீட்டு வாய்ப்புகள் உருவாகி வருகிறது என்பதை வல்லுநர்கள் மூலம் கண்டறிந்து அந்த துறைசார்ந்தவர்களுக்கு பயிற்றுவிக்கும் வேலைகளை முஸ்லிம் சமுதாய அமைப்புகள் முன்னெடுக்க வேண்டும்.

சமுதாய அமைப்புகள் அடுத்த பத்தாண்டுகளுக்கு இதையே முழு ஈடுபாட்டுடன் செய்தால் சவூதியில் வாழும் தமிழக முஸ்லிம்களிலிருந்து மிகச்சிறந்த தொழில் ஆளுமைகள் உருவாகி வருவார்கள்.

எதிர்காலத்தில் அவர்கள் அரபுலக ஆட்சியாளர்களுடன் இணைந்து தொழில் செய்யும் சூழல் உருவாகலாம்.

சிந்தனை மாற்றமே சமூக மாற்றம்.

-CMN SALEEM

புதுச்சேரி பைத்துல் ஹிக்மா வளாகத்தில் இயங்கிவரும் ஜாமிஅத்துல் ஹிக்மா அரபிக் கல்லூரியில் தேசிய அரசியலமைப்பு தினம் (National Constitution Day) விழா நடைபெற்றது.

இந்திய அரசமைப்புச் சட்டத்தை உருவாக்கிய அரசியல் நிர்ணய சபையில் நடைபெற்ற முக்கிய விவாதங்களை ஆலிமியத் கல்வி பயிலும் மாணவர்கள் அப்படியே காட்சிப்படுத்தினர்.

மாதிரி நீதிமன்றமும் (Moot Court ) நடைபெற்றது.

மூன்று வழக்கறிஞர்கள் நீதிபதிகளாக அமர்ந்திருக்க மாணவர்கள் இரண்டு முக்கிய வழக்குகளை எடுத்து விவாதித்தனர்.

Aalim + Advocate என்பது தான் ஜாமிஅத்துல் ஹிக்மா அரபிக் கல்லூரி மாணவர்களின் இலக்கு.

தமிழ்நாடு முஸ்லிம் கல்வி இயக்கம் முஸ்லிம் பிள்ளைகளுக்கு எதை வலியுறுத்தி வருகிறதோ அதன்படி உருவாக்கியும் வருகிறது.

அல்ஹம்துலில்லாஹ்.

தமிழக கடற்கரை கிராமங்களில் பல முஸ்லிம் குடும்பங்கள் பன்னெடுங்காலமாக மீன்பிடித் தொழில் செய்து வருகின்றனர். இவர்களின் சமூகப் பொருளாதார வாழ்வியல் நிலைகளில் பெரிய முன்னேற்றங்களுக்கு வழியில்லாமல் இருக்கிறது.

இந்த குடும்பங்கள் வாழும் சூழலையும் அவர்களின் பொருளாதார நிலைகளையும் கருதி சில சமூக ஒதுக்குதல் ஆங்காங்கே இருக்கத்தான் செய்கின்றன.

இந்த மீனவ குடும்பங்களில் தற்போது பள்ளி கல்லூரிகளில் படித்துக் கொண்டிருக்கும் பிள்ளைகளின் உயர்கல்விக்கு மிகச்சரியான இலக்கு நிர்ணயித்து ஊக்கப்படுத்தினால் அடுத்த 15 ஆண்டுகளில் பெரும் மாற்றங்களை ஏற்படுத்த முடியும். ஏற்படுத்த வேண்டும்.

இந்த பிள்ளைகளின் மரபணுவில் கடல்சூழல் குறித்த பதிவுகள் உள்ளன. இவர்களின் உயர்கல்வி மற்றும் ஆராய்ச்சியில் கடலியல் (Oceanography) கடல்சார் உயிரியல் (Marine Biology) வானிலையியல் (Meteorology) கடல் வள மேலாண்மை (Marine Resource Management)உள்ளிட்ட படிப்புகளில் ஆராய்ச்சிக் கல்வியை முன்னெடுக்க ஆர்வப்படுத்த வேண்டும்.

அரபுநாடுகளில் இத்தகைய ஆராய்ச்சிப் படிப்புகளுக்கு அரசுப் பல்கலைக்கழகங்கள் அனைத்தும் ஏராளமாக நிதியுதவி செய்கின்றன.

பொருளாதார அதிகாரம் அடைவதற்கும் சமூக அடையாளங்கள் மாறுவதற்கும் உயர்கல்வியும் ஆராய்ச்சியும் தான் வித்து.

மீன்பிடித்தொழில் ஒரு பரக்கத்தான தொழில். அதேநேரம் கடல் ஆராய்ச்சிகள் என்பது அல்லாஹ்வுக்கு உகந்த ஒரு இபாதத்.

மீனவ குடும்பங்கள் மாற்றி சிந்திக்க வேண்டும்.

இராமநாதபுரம்,பெருங்குளம் அல் கலம் இன்டர்நேஷனல் பள்ளியில் கல்வி விழிப்புணர்வு மாநாடு நடைபெற்றது.

பள்ளியின் நிறுவனர் ஆஸ்திரேலிய நாட்டின் கிராண்ட் முஃப்தி மெளலானா அப்துல் குத்தூஸ் அஸ்கரி அவர்கள் தலைமையில் நடைபெற்ற இவ்விழாவில் நாடாளுமன்ற உறுப்பினர் நவாஸ் கனி,பேராசிரியர் ஹாஜா கனி ஆகியோருடன் நானும் கலந்து கொண்டேன்.

உயர்ந்த இலக்குடன் இயங்கி வரும் இந்த இன்டர்நேஷனல் பள்ளியை முகவை பகுதி மக்கள் மிகச்சரியாக பயன்படுத்திக் கொள்ள வேண்டும்.

தமிழக முஸ்லிம்களிடையே முதன்முறையாக இஸ்லாமிய நிதியியல் மற்றும் ஹலால் பங்குச்சந்தை முதலீடுகள் குறித்த ஒருநாள் வகுப்பு பைத்துல் ஹிக்மாவில் நடைபெற்றது.

இந்திய பங்குச் சந்தையில் ஷரீஅத் வகைக்கு உட்பட்ட பங்குகளை எதன் அடிப்படையில் தரம் பிரிப்பது,அதற்கு அறிஞர்களின் வழிகாட்டுதல் என்ன என்பது குறித்து மெளலவி உமர் ஹஸனி அவர்கள் வகுப்பெடுத்தார்கள்.

முதலீடுகள்,நிதி மேலாண்மை,அதற்கான திட்டமிடல் குறித்து நிதித்துறை வல்லுனர் சகோதரர் இம்தியாஸ் அவர்கள் வகுப்பெடுத்தார்கள்.

சவூதி அரேபிய பங்குச் சந்தையில் முதலீடு செய்யும் வழிமுறைகள் குறித்து சவூதி அல்கோபரிலிருந்து சகோதரர் சீனி முஹம்மது அவர்கள் எளிய முறையில் வகுப்பெடுத்தார்கள்.

சர்வதேச அளவில் இஸ்லாமிய வங்கியியல் & நிதி (Islamic Banking and Finance) மேற்படிப்பு மற்றும் ஆராய்ச்சி எங்கெல்லாம் படிக்கலாம் என்பது குறித்த விரிவான தகவல்களை பேராசிரியர் இஸ்மாயில் அவர்கள் விளக்கினார்கள்.

முஸ்லிம்கள் செல்வம் (ஆயுதம்) பெருக்க வேண்டியதின் கட்டாயம் குறித்தும், கல்விநிதியுதவி அளித்து இஸ்லாமிய நிதியியல் வல்லுனர்களை உருவாக்க வேண்டிய கட்டாயம் குறித்தும், உற்பத்தித் தொழில் (Manufacturing Business) சாம்ராஜ்யங்களை உருவாக்கும் இலக்கு குறித்தும் நான் வகுப்பெடுத்தேன்.

தமிழகம் முழுவதிலிருந்தும் ஏராளமான படித்த விவரம் அறிந்த சகோதர சகோதரிகள் ஆர்வத்துடன் கலந்து கொண்டனர்.

முஸ்லிம்களை ஆற்றல்படுத்தி அதிகாரப்படுத்தும் இதுபோன்ற பயனுள்ள பயிலரங்குகளைத் தான் இன்றைய அறிஞர்கள் மற்றும் சமுதாய அமைப்புகளிடமிருந்து முஸ்லிம்கள் அதிகம் எதிர்பார்க்கின்றனர் என்பதை இந்த நிகழ்ச்சி உணர்த்தியது.

ஆராய்ச்சிக் கல்வியும் உற்பத்தி பொருளாதாரமும் இன்றைய காலத்தின் பேராற்றல்மிக்க ஆயுதங்கள் என்பதை நினைவில் கொள்வோம்.

இஸ்லாமிய வரலாற்று ஒளியில் நம் பிள்ளைகளின் உயர்கல்வி மற்றும் ஆராய்ச்சிக்கான இலக்கு என்ற கருத்தியலில் புதுச்சேரி பைத்துல் ஹிக்மவில் ஒருநாள் பயிலரங்கம் நடைபெற்றது.

கோட்டக்குப்பம் இஸ்லாமிக் வெல்ஃபர் சொசைட்டி யில் அங்கம் வகிக்கும் ஆலிமாக்கள் மற்றும் பட்டதாரி மாணவ மாணவிகள் திரளாக கலந்து கொண்டனர்.

ஆண் பிள்ளைகளை ஆராய்ச்சியாளர்களாக உருவாக்குவோம்.

பெண் பிள்ளைகளை கல்வியாளர்களாக உருவாக்குவோம்.

அடுத்த அரைநூற்றாண்டு காலத்துக்கு மஹல்லாக்களில் ஓங்கி ஒலிக்கப்பட வேண்டிய மறுமலர்ச்சிக்கான முழக்கம் இது.

தமிழ்நாடு முஸ்லிம் கல்வி இயக்கத்தின் சார்பில் பெற்றோர்களின் உள்ளங்களில் தொடர்ந்து விதைக்கப்பட்டு வருகிறது.

Darussalam School of Islamic Studies for Girls நிறுவனத்தின் ஆண்டுவிழா இஸ்லாமிய கலாச்சார விழாவாக அம்மாபட்டினம் அன்னை கதீஜா கலை அறிவியல் மகளிர் கல்லூரி வளாகத்தில் நடைபெற்றது.

பெண்கல்வியாளர்களை உருவாக்கும் தொலைநோக்கு இலக்குடன் இயங்கும் கல்வி நிறுவனம்.

7 & 5 ஆண்டுகள் ஆலிமா படிப்புடன் NIOS பாடத்தில் ஆங்கில வழியில் பள்ளி இறுதித்தேர்வை எழுதி முடித்து கல்லூரி படிப்பையும் படிக்கும் வகையில் விடுதி வசதியுடன் கூடிய கல்வி நிறுவனம்.

நாகை மாவட்டம் தோப்புத்துறை முஸ்லிம் ஜமாஅத் மன்றம் நடத்திய பெண்களுக்கான தன்முனைப்பு பெண்கள் ஜமாத் அறிமுக விழா நிகழ்ச்சி ஜமாஅத் மன்ற தலைவர் தலைமையில் சிறப்புடன் நடந்தேறியது.

அம்மாபட்டினம் அன்னை கதீஜா அகாடமியின் தாளாளர் ஆலிமா S. நஜ்மா M.A. M.Sc (Psy) அவர்கள் சிறப்புரை ஆற்றினார்கள்.

இந்த நிகழ்வில் 300 க்கும் மேற்பட்ட பெண்கள் கலந்து கொண்டு சிறப்பித்தனர்.

மேலும் ஜமாஅத் மன்ற நிர்வாகிகளும் ஜமாஅத்தார்களும் ஆர்வமுடன் பங்கேற்றனர்.

தமிழ்நாடு முஸ்லிம் கல்வி இயக்கத்தின் சார்பில் உருவாக்கப்பட்டு வரும் பைத்துல் ஹிக்மாவில் அமைந்துள்ள ஜாமிஅத்துல் ஹிக்மா அரபிக் கல்லூரியின் 6ஆம் ஆண்டு நிறைவு மற்றும் பரிசளிப்பு விழா நடைபெற்றது.

7ஆண்டுகள் மரபுவழி மதரஸா கல்வி கற்கும் இந்த இளம் ஆலிம்கள் உயர்கல்வியில் சட்டம் ஆட்சிப்பணி இதழியல் ஆகிய அதிகாரமிக்க துறைகளை இலக்காக கொண்டு படித்து வருகின்றனர்.

இவ்விழாவில் ஜாமிஆவின் 7ஆம் ஆண்டு மாணவர்கள், நெதர்லாந்தில் உள்ள சர்வதேச நீதிமன்றத்தில் (ICJ) நடைபெற்ற தென்அமெரிக்க நாடுகளின் சுற்றுச்சூழல் தொடர்பான ஒரு வழக்கை மாதிரி நீதிமன்றம் (Moot Court) அமைத்து விவாதம் செய்தனர்.

வளரும் பிள்ளைகளுக்கு கூர்மையான இலக்கு நிர்ணயித்து பயிற்சி அளிக்கப்படும் போது வெறும் பட்டதாரிகளாக உருவாகாமல் சமூகத்துக்கும் நாட்டுக்கும் தேவயான சிறப்புத் திறனுடைய அறிஞர்கள் உருவாகிறார்கள்.

உயர்வான இலக்கை நோக்கி பிள்ளைகளை உருவாக்குவதில் நீண்டகால பொறுமையும் தளராத அர்ப்பணிப்பும் எவ்வாறு இருக்க வேண்டும் என்று பெற்றோர்களுக்கு வகுப்பெடுக்கப்பட்டது.