முஹல்லா தெருக்களிலிருந்து உலகின் ஆகச்சிறந்த ஆராய்ச்சியாளர்களையும் சர்வதேச சட்ட வல்லுநர்களையும் உருவாக்கும் வழிமுறைகள் குறித்த பயிலரங்கம் இடைவிடாமல் நடைபெற்று வருகிறது.

மதுரை விளாச்சேரியில் ” நெருக்கடியான காலத்தில் அடுத்த தலைமுறையை உருவாக்கும் வழிமுறைகள் ” குறித்து கல்வியாளர்கள் ஒருங்கிணைப்பு கருத்தரங்கம் நடைபெற்றது.

முஹல்லா மக்களை அதிகாரப்படுத்துவதில் தொலைநோக்கு இலக்குடன் இயங்கும் விளாச்சேரி நூருல் ஹுதா அறக்கட்டளையின் பொறுப்பாளர்கள் இந்நிகழ்வை மிகச்சிறப்பாக ஏற்பாடு செய்திருந்தனர்.

” நான் சொல்லுவதை உங்கள் வீட்டுப் பிள்ளைகளிடமும் ஊர் பிள்ளைகளிடமும் அப்படியே நடைமுறைப்படுத்துங்கள்.

இன்ஷா அல்லாஹ் அடுத்த 10 – 15 ஆண்டுகளில் குலசேகரப்பட்டினத்தில் அடுத்த ஆண்டு துவங்கப்பட உள்ள இஸ்ரோவின் இரண்டாவது ராக்கெட் ஏவுதளத்தின் இளம் விஞ்ஞானிகளாக உங்கள் பிள்ளைகள் அமர்ந்திருப்பார்கள்.

கணிதம்,வேதியியல்,இயற்பியல், விண்வெளி, நிலவியல்,ராக்கெட் தொழில்நுட்பம் செமிகண்டக்டர்….. இதுபோன்று அறிவியல் தொழில்நுட்பங்களில் உங்கள் பிள்ளைக்கு பிடித்தமான துறையில் ஆராய்ச்சிக் கல்வியை முன்னெடுக்கத் தூண்டுங்கள்.

இதெல்லாம் வெறுமனே பள்ளி கல்லூரி படிப்புகள் என்று நினைத்து விடாதீர்.

அறிவியல் ஆராய்ச்சி என்பது அல்லாஹ்வுக்கு பிடித்தமான இபாதத் {வழிபாடு}. படைப்புகளின் நுட்பத்தையும் அதனுள் பொதிந்துள்ள இரகசியத்தையும் அறிந்து கொள்ளும் மகத்துவமான இபாதத்.

ஐவேளை தொழுகைக்கு தூண்டுவது போன்று அல்லாஹ்வின் படைப்புகளில் ஆராய்ச்சி செய்வதற்கு உங்கள் ஆண் பெண் பிள்ளைகளைத் தூண்டுங்கள்.

வெகுவிரைவில் உயிர்களுக்கும் இந்த நாட்டுக்கும் மதிப்பு மிகுந்த செல்வங்களாக உங்கள் பிள்ளைகள் மாறிப்போவார்கள் “

————————————-

இந்தியாவின் இரண்டாவது ராக்கெட் ஏவுதளம் அமைந்துள்ள தூத்துக்குடி மாவட்டம் குலசேகரப்பட்டினத்தின் பாரம்பரியமிக்க ஹஸனியா நடுநிலைப்பள்ளியில் குலசை சங்கமம் 2.0 நிகழ்ச்சியின் இறுதியில் பரிசளிப்பும் கல்வி விழிப்புணர்வு நிகழ்ச்சியும் நடைபெற்றது.

அம்மாபட்டினம் அன்னை கதீஜா கலை அறிவியல் மகளிர் கல்லூரியின் வணிகவியல் துறை சார்பில் ” மகளிர் தொழில்முனைவு மற்றும் அதிகாரமளித்தல் ” {STATE LEVEL CONFERENCE ON WOMEN ENTREPRENEURSHIP AND EMPOWERMENT} என்றது தலைப்பில் மாநில அளவிலான ஒரு நாள் கருத்தரங்கம் நடைபெற்றது.

தொழில் செய்யும் ஆர்வமுள்ள மகளிருக்கு அனைத்து துறைகளிலும் அதிகரித்து வரும் வாய்ப்புகளை நிபுணத்துவம் மிக்க 4 வல்லுநர்கள் மிகத் துல்லியமாக கவனப்படுத்தினர்.

அரசு கலை அறிவியல் கல்லூரி – பேராவூரணி

வெங்கடேஸ்வரா கல்லூரி – பேராவூரணி

காதர் முஹைதீன் கல்லூரி – அதிராம்பட்டினம்

அரசு கலை அறிவியல் கல்லூரி – அறந்தாங்கி

உள்ளிட்ட பல்வேறு கல்லூரிகளிலிருந்து இளநிலை முதுநிலை பயிலும் சுமார் 80 மாணவிகள் கலந்து கொண்டு ஆய்வறிக்கை சமர்ப்பித்தனர்.

பெண்களிடம் உழைப்பையும் பொருளீட்டலையும் வலியுறுத்தி அவர்களை அதிகாரப்படுத்தும் கருதரங்கமாக இது அமைந்திருந்தது.

ஷரீஅத்தை முறைப்படி கற்ற ஆலிம்களை சட்ட வல்லுனர்களாகவும் இந்திய ஆட்சிப்பணிக்கும் இடைவெளியின்றி உருவாக்க வேண்டும் என்ற உயார்வான இலக்குடன் தமிழ்நாடு முஸ்லிம் கல்வி இயக்கம் புதுச்சேரி மாநிலம் கடுவனூரில் கட்டமைத்து வரும் பைத்துல் ஹிக்மா கல்வி வளாகத்தின் முதல் நிறுவனமான ஜாமிஅத்துல் ஹிக்மா அரபிக் கல்லூரியின் முதலாவது பட்டமளிப்பு விழா பிப்.1 அன்று நடைபெற்றது.

தமிழ்மாநில ஜமாஅத்துல் உலமாவின் ஆளுமை மிக்கத் தலைவர் மௌலானா P.A.காஜா மொயீனுத்தீன் பாக்கவி அவர்களும் மேனாள் மாவட்ட நீதிபதி அ.முஹம்மது ஜியாவுதீன் அவர்களும் சிறப்பு விருந்தினர்களாக கலந்து கொண்டனர்.

அல்லாஹ்வின் கருணையால்….தமிழ்நாடு முஸ்லிம் கல்வி இயக்கம் தொடர்ச்சியாக முன்வைத்து வரும் உயர்கல்வி இலக்கின் அடையாளங்கள் உருவாகி வரத் துவங்கிவிட்டது.

அல்ஹம்துலில்லாஹ்….

ஆலிம் + அட்வகேட் / ஆலிம் + IAS உள்ளிட்ட அதிகாரமிக்க இலக்கை நோக்கி தங்களின் உயர்கல்விப் பயணத்தை தொடரும் இந்த இளம் உலமாக்களுக்காக துஆ செய்யுங்கள்.

ஆயிரக்கணக்கான பெண் கல்வியாளர்களை உருவாக்கும் ஒற்றை இலக்குடன் இயங்கும் அன்னை கதீஜா கலை அறிவியல் மகளிர் கல்லூரியின் முன்னாள் மாணவிகள் சந்திப்பு நிகழ்ச்சி {Alumnae Meet 2026} மார்ச் 31 அன்று நடைபெற்றது.

அன்னை கதீஜா கலை அறிவியல் மகளிர் கல்லூரி மற்றும் தாருஸ்ஸலாம் இஸ்லாமியப் பள்ளியில் படித்து பட்டம் பெற்றுச் சென்றுள்ள ஆலிமாக்களும் முபல்லிஹாக்களும் திருமணம் குழந்தைகள் குடும்பப் பொறுப்புகள் வாழ்க்கைச் சுமைகள் உள்ளிட்ட அழுத்தமான பொறுப்புகளுடன் சேர்த்து….

நிஸ்வான் மதரஸா உஸ்தாதாக்களாக பள்ளிக்கூட ஆசிரியர்களாக கல்லூரிப் பேராசிரியர்களாக கல்வி நிறுவனங்களின் நிர்வாகிகளாக உளவியல் ஆலோசகர்களாக ஊட்டச்சத்து நிபுணர்களாக அரசுப் பணியாளர்களாக….. இப்படி

தாங்கள் கற்ற கல்வி மற்றும் பண்பாட்டின் மூலம் பல்வேறு பயனுள்ள துறைகளில் ஆளுமை செலுத்தி வருவதை நிகழ்ச்சியில் வெளிப்படுத்தினார்கள். அது படித்துக் கொண்டிருக்கும் மாணவிகளுக்கு பெரும் நம்பிக்கையை ஏற்படுத்தியது.

என்ன நோக்கத்திற்காக அன்னை கதீஜா கல்லூரி உருவாக்கப்பட்டதோ அந்த நோக்கம் நிறைவேறி வருவதை கண்கூடாகப் பார்க்க முடிந்தது.

அல்ஹம்துலில்லாஹ்.

அன்னை கதீஜா கலை அறிவியல் மகளிர் கல்லூரி உங்களின் அறிவு மற்றும் ஆன்மிகப் பண்பாட்டின் தாய் வீடு என்பதையும்,நீங்கள் உலகின் எங்கு வாழ்ந்தாலும் உங்களின் உயர்கல்வி மற்றும் ஆராய்ச்சிக்கு கல்லூரி என்றென்றும் எல்லா வகையிலும் துணை நிற்கும் என்பதையும் மீண்டும் ஒருமுறை அவர்களின் உள்ளங்களில் பதியவைத்து அனுப்பிய நிகழ்வாக இந்த முன்னாள் மாணவிகள் சந்திப்பு நிகழ்ச்சி இருந்தது.

தொழில் துறைகளில் ஆளுமை செலுத்தும் அம்மாபட்டினம் உள்ளிட்ட கடற்கரையோர பட்டினங்களில் வளரும் பிள்ளைகளிடம் அறிவியல் தொழில்நுட்ப ரீதியான உயர்கல்வி ஆராய்ச்சி அதனூடான உற்பத்தித் தொழில் நவீனகலத்தின் அறிவுசார் பொருளாதாரம் இவற்றை கவனப்படுத்திடும் உயர்கல்வி வழிகாட்டுதல் & கல்வி கருத்தரங்கம் நடைபெற்றது.

ஆன்மிகப் பின்புலத்திலான ஆராய்ச்சிக் கல்வியும் அதிகாரத்துடன் கூடிய பொருளாதார வளர்ச்சியும் தான் முஸ்லிம் உம்மத்தை வலிமைப்படுத்தும் என்ற செய்தி ஆழமாக விதைக்கப்பட்டது.

காலத்தின் நெருக்கடியை உணர்ந்த அம்மாபட்டினம் எஜுகேஷனல் டிரஸ்டின் பொறுப்பாளர்கள் இந்நிகழ்வை மிகச் சிறப்பாக ஏற்பாடு செய்திருந்தார்கள்.

ஆன்மிகப் பின்புலத்திலான அறிவாற்றலும் பொருளாற்றலும் தான் முஸ்லிம் சமூகத்தின் பாதுகாப்புக்கும் கண்ணியத்துக்குமான அடித்தளங்கள்.

சமூக அக்கறையுடைய வள்ளலுடன் தொலைநோக்கு இலக்குடைய மார்க்க அறிஞரும் அர்ப்பணிப்பு உணர்வுடைய ஆசிரியர்களும் இணைந்ததின் வெளிப்பாடு தான் புஹாரி ஆலிம் அரபிக் கல்லூரி.

” கடந்த கால் நூற்றாண்டு காலமாக தமிழக முஸ்லிம் சமூகத்தில் மகத்தான அறிவுப் புரட்சியை உண்டாக்கி வரும் அரபிக் கல்லூரியின் பெருமைமிக்க மாணவர்கள் நீங்கள்.

ஆலிம் பட்டதாரிகள் என்ற அடையாளத்துடன் உருவாகி வரும் நீங்கள் அடுத்தடுத்த காலங்களில் தேர்வு செய்யும் மேற்படிப்பும் ஆராய்ச்சிக் கல்வியும் உங்களை அறிவிலும் பொருளிலும் வல்லமைமிக்கவர்களாக மாற்றிட வேண்டும். அதற்கேற்ற ஆராய்ச்சிக் கல்விப் பிரிவுகளை உங்களுக்கு கவனப்படுத்துகிறேன்….

உங்களைப் போன்ற இளைஞர்களின் உள்ளங்கள் பொழுது போக்கில் நேரத்தை வீணாக்குகிறது என்றால், சொகுசு வாழ்வை விரும்புகிறது என்றால், சிரமப்படாமல் செல்வம் பெருக வேண்டும் என்று ஏங்குகிறது என்றால், பெருமானார் {ஸல்} அவர்கள் எச்சரிக்கை செய்த மனித பலவீனங்களும் சோம்பேறித்தனமும் உள்ளே புகுந்துவிட்டது என்று பொருள்.

உங்களுக்காக,உங்களை சார்ந்துள்ள உங்கள் குடும்பத்துக்காக,உங்களின் வழிகாட்டுதலுக்கு ஏங்கி நிற்கும் முஸ்லிம் உம்மத்துக்காக, உங்களிடம் அமானிதமாக ஒப்படைக்கப்பட்டுள்ள அல்லாஹ்வுடைய தீனுக்காக,உங்களின் உயிரையும் உடமைகளையும் உரிமைகளையும் பாதுகாக்கும் இந்த நாட்டுக்காக நீங்கள் விழிப்புடன் துடிப்புடன் அயராத உழைப்புடன் ஓடிக்கொண்டே இருக்க வேண்டும்.

வறுமையின் விளிம்பில் நின்றாலும் படித்து முடித்தவுடன் வேலைவாய்ப்பைத் தேடி ஓடிவிடாதீர்.

உங்களை முழுமையாக தகுதிப்படுத்திக் கொள்ளுங்கள் அறிவும் பொருளும் அதிகாரமும் உங்களை தேடி ஓடிவரும் “

-CMN SALEEM

இந்திய முஸ்லிம்களுக்கு நாலாபுறமும் நெருக்கடிகள் சூழ்ந்து வரும் சூழலில் தொலைநோக்கு இலகுடைய கல்விப் பணிகளின் மூலமாக மட்டுமே அடுத்த தலைமுறையை ஆற்றல் மிக்கத் தலைமுறையாக உருவாக்கிட முடியும்.இதை மிகச்சரியாக புரிந்து கொண்ட பல உலமாக்களும் ஜமாஅத் நிர்வாகங்களும் தங்கள் முஹல்லாக்களில் தொடர்ச்சியான கல்விப் பணிகளை முன்னெடுத்து வருகின்றனர்.

நீலகிரி மாவட்ட அரசு காஜி தலைமையில் இயங்கும் அல் முஹ்ஸின் சமூக நலக்குழு, மதீனா மஸ்ஜித் நிர்வாகம், உதகை ஐக்கிய ஜமாஅத் ஆகிய அமைப்புகள் இனைந்து நடத்திய உயர்கல்வி வழிகாட்டுதல் நிகழ்ச்சி ஊட்டியில் நடைபெற்றது.

பெரும்பாலும் சுற்றுலாத் துறையை சார்ந்த சிறு குறு வியாபாரிகளாக வாழ்ந்து வரும் முஸ்லிம்கள் இனிவரும் காலங்களில் தங்களது பிள்ளைகளை மேற்குத் தொடர்ச்சி மலைப் பொருளாதாரத்தின் வல்லுனர்களாக உருவாக்கிடும் உயர்கல்வி ஆராய்ச்சிப் பிரிவுகளை முன்வைத்து பயிற்சியளித்தோம்.

உயிரியல் பிரிவு மாணவர்கள் தாவரவியல் {Botany} தோட்டக்கலை {Horticulture} மலர் உற்பத்தி {Floriculture} நீரியல் வளர்ப்பு { Hydrophonics} உள்ளிட்ட துறைகளில் ஆராய்ச்சிக் கல்வி {PhD} மேற்கொள்ள வேண்டும்.

அலங்காரத்திற்காக மட்டுமே பயன்படுத்தப்படும் ஊட்டியின் ரோஜா மலர்களை சவூதியின் தாயிஃப் பகுதி ரோஜா மலர்களுக்கு நிகராக திறன் மேம்படுத்துகிற ஆராய்ச்சிக்கல்வியை முன்னெடுத்தால் அத்தர் உற்பத்தியில் சர்வதேச தொழில் முனைவோர்கள் உருவாகும் சூழல் உண்டாகும் என்ற கருத்தை ஆதாரங்களுடன் பதிவு செய்தோம்.

அதுபோன்று ஆராய்ச்சிக்கல்வியை முன்னெடுக்கும் மாணவர்களுக்கு முழு கல்வி கட்டணத்தையும் செலுத்துவதற்கு நிகழ்ச்சியை ஏற்பாடு செய்த அமைப்புகளும் தமிழ்நாடு முஸ்லிம் கல்வி இயக்கமும் தயாராக இருப்பதையும் கவனப்படுத்தினோம்.

தமிழ்நாடு முஸ்லிம் கல்வி இயக்கத்தின் சார்பில் அடுத்த தலைமுறை பிள்ளைகளுக்கு உயர்கல்வி மற்றும் ஆராய்ச்சி ரீதியாக இலக்கு நிர்ணயிக்கும் தலைமைத்துவ பயிலரங்கம் பைத்துல் ஹிக்மாவில் துவங்கியது.

வரலாற்றில் முன்னெப்போதும் இல்லாத வகையில் கவனச்சிதைவுக்கு உள்ளாக்கப்படும் இன்றைய இளம் தலைமுறையை ஒரு உயர்வான இலக்கை நோக்கி கூர்மைப்படுத்துவது பெரும் சவாலாக இருக்கிறது.

ஆன்மிகப் பின்புலத்திலான உயர்கல்வியும் ஆராய்ச்சியும் தான் முஸ்லிம் உம்மத்தை அதிகாரப்படுத்தும் என்பதை இவர்கள் புரிந்து கொண்டால் மகத்தான மாற்றங்கள் உண்டாகும்.

இன்றைய காலத்திலும் இனிவரும் காலத்திலும் அறிவாற்றலும் பொருளாற்றலுமே ஒரு சிறுபான்மை சமூகத்தின் பாதுகாப்புக்கான அதிகாரங்கள்.

மூஃமினான பிள்ளைகளுக்கு இலக்கு நிர்ணயித்துக் கொடுத்து தொடர்ச்சியாக வழிகாட்டுவதின் மூலம்தான் இந்த இரண்டு ஆற்றல்களையும் அடைய முடியும்.அதன் மூலம் தான் நிலையான சமூக மாற்றங்களும் சாத்தியப்படும்.

தமிழ்நாடு முஸ்லிம் கல்வி இயக்கத்தின் சார்பில் 10/12 ஆம் வகுப்பு மாணவர்களுக்கான 15 நாட்கள் தலைமைத்துவப் பயிலரங்கத்தின் நிறைவு விழா பைத்துல் ஹிக்மாவில் நடைபெற்றது.

இந்தப் பயிலரங்கில் கலந்து கொண்ட மாணவர்களுக்கு மிகச்சரியான உயர்கல்விப் பிரிவுகளை கவனப்படுத்தி,அதை அடைய நீண்டகாலம் உழைப்பதற்கான மனநிலைக்கும் பயிற்சி அளிக்கப்பட்டது.

பெற்றோர்களே…..ஆண் பிள்ளைகளிடம் அன்பையும் சாதிக்க வேண்டும் என்ற உணர்வையும் எதையும் எதிர்கொள்ளும் துணிச்சலையும் இடைவிடாமல் விதையுங்கள்